Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 516 Hüküm no: 620 Orijinal metin no: [107a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pazarcılar ile sebzecilerin birbirlerinin işlerine karışmamak üzere anlaştıkları Sebzeciler ile pazarcıların ittifâk hüccetidir. Dârü’l-hilâfeti’l-aliyye Kostantıniyye el-mahmiyye’de sebzeciler hırfetinin hâlâ kethüdâları olan Ramazan Çelebi b. Ahmed ve yiğitbaşıları diğer Ramazan b. Abdullah ve ihtiyârlarından Şaban b. Mehmed ve Oruc Beşe b. Sinan ve Ebûbekir Beşe b. Mehmed ve es-Seyyid Ahmed Çelebi b. Mustafa nâm kimesne meclis-i şer‘-i hatîr-i lâzımü’t-tevkīrde mahmiye-i mezbûrede pazarcılar tâifesinden pazarbaşı Ahmed Ağa b. Ali ve Hasan Bey b. Şaban ve Nasuh Beşe b. Şaban ve Ahmed Yazıcı b. Mehmed ve Hanefi Bölükbaşı b. Abdullah nâm kimesneler mahzarlarında her biri takrîr-i kelâm ve ta‘bîr ani’l-merâm edip kadîmden alıp dükkânlarımızda sattığımız kabak ve bazincan ve kıvrık ve kelem ve isfenah ve şalgam ve havuç ve turp ve tâze soğan ve sarımsak ve bağ yaprağı ve hıyar ve marul ve tere ve tarhun ve kerefs [kereviz] ve sebzevât makūlesini pazarcı tâifesi ve koltukçular alıp satmayalar deyû kıbel-i saltanat-ı aliyyeden yedimizde emr-i şerîf ihsân olunup hüccetimiz dahi var iken mûcebince ba‘zıları memnû‘ olmayıp bizim metâ‘ımızı alıp satmalarıyla ba‘de’l-yevm pazarcı tâifesi ve koltukçular yedimizde olan hüccet-i münîfe ve emr-i hümâyûna muhâlif zikr olunan metâ‘ımızı ve sebzevât makūlesini alıp satmamak üzre mezbûrlar ile beynimizde kavl ve ittifâk ve ahd ü mîsâk eyledik dediklerinde gıbbe’t-tasdîki’ş-şifâhî işbu vesîka-i enîka hıfzan li’l-makāl bi’t-taleb ketb olunup yedlerine def‘ ve i‘tâ olundu. Fi’l-yevmi’s-sâdis min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Süleyman Bey b. Hüseyin Vekîl-i bostancı Ağa, Mustafa Ağa Kethüdâ-yı muhzırân, Mustafa Çelebi Ser-muhzırân, İbrahim Çelebi b. Ahmed.