İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 402 Hüküm no: 499 Orijinal metin no: [95b-3, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Marziye Hatun’un mehir alacağı hususunda ibra Mahmiye-i Kostantıniyye mahallâtından Şeyh Ferhad mahallesinde bundan akdem vefât eden merhûme Marziye Hatun’un ebeveyni ve vârisi olan es-Seyyid Mehmed b. es-Seyyid Ali ve Kerime bt. Abdullah meclis-i şer‘a hâzırân olup âti’z-zikr ibrâyı ikrâr ettikten sonra Ali Bey b. Mehmed el-cündî ve Ahmed Bey b. Abdullah habbâz-ı sultânî nâm kimseler meclis-i şer‘-i şerîfe gelip âti’l-beyân husûsa vasîyy-i şer‘î olan Mehmed b. Ramazan nâm hasm-ı münkir mahzarında, müteveffât-ı mezbûrenin zevci Mahmud Halîfe b. Mehmed’den sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffât-ı merkūme Marziye Hatun bt. es-Seyyid Mehmed zeyilde mezkûr târihden sekiz sene evvel bizim yanımızda mezbûr Mahmud Halîfe’nin zimmetinde bulunan, nikâhında ma‘kūdun-aleyh olan râyicü’l-vakt on bin akçe mehr-i müeccel hakkının sekiz bin akçesini ibrâ ettiğini ikrâr eylemişti. Şehâdeten sahîhaten şer‘iyeten makbûleten ba‘de ca‘li şerâiti’l-kabûl mer‘iyeten şehâdetleri mûcebince sıhhat-i ibrâya hükmedildi. Cerâ zâlike ve hurrire fi’r-râbi‘ ve’l-ışrîn min-Şa‘bân li-sene 1005. Şühûdü’l-hâl: Es-sâbikūn el-evvelûn