Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 518 Hüküm no: 622 Orijinal metin no: [107b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Boğdan voyvodası Duka’nın vârislerinin birbirlerinin zimmetlerini ibrâ ettikleri Husûs-ı âti’l-beyânı mahallinde ketb ve terkīm için bi’t-taleb irsâl olunan İmâmzâde Mehmed Efendi, Boğdan voyvodası oldukdan sonra hâlik olan Duka Voyvoda’nın mahmiye-i İstanbul’da Fenerkapısı kurbunda hayâtında sâkin olduğu menzile varıp zeyl-i kitâbda mektûbü’l-esâmî müslimîn huzûrlarında akd-i meclis-i şer‘-i nebevî ettikde, mezbûr Duka’nın kebîre kızı olup diyâr-ı Eflak’da bundan akdem hâlik olan Katrine’nin verâseti babası mezbûr Duka ile vâlidesi Anastasya bt. Dimitri Bohus nâm nasrâniye ve bir zevci İstefan v. Kevork Duka’ya münhasıra olup ba‘dehû mezbûr Duka v. ( ) dahi hâlik olup verâseti zevcesi mezkûr Anastasya ile kebîr oğlu Kostandil ve sagīr oğulları Yani ve İstefan meclis-i ma‘kūd-ı mezbûrda, kendi tarafından asîl ve sıgār-ı mezkûrûnun tesviye-i emirleri için savb-ı şer‘den mansûbe vasîleri olan mezbûr Anastasya ile kezâlik kendi tarafından asîl ve mezbûre İlan ve Sande ve Marya taraflarından husûs-ı âti’l-beyâna vekîl olup Hüsnü Çelebi b. Mehmed ve Mehmed Çelebi b. Cafer şehâdetleriyle şer‘an vekâleti sâbite olan mezbûr Kostandil muvâcehelerinde bi’t-tav‘ ikrâr-ı tâm ve takrîr-i kelâm edip zevcim hâlik-i mezbûrenin kalîl ü kesîr ve ü ve hakīr eşyâsından bi’l-irsi’ş-şer‘î bana isâbet eden hisse-i şer‘iyyemi vâzı‘ayi’l-yed olan mezbûrân Anastasya ve Kostandil’den taleb [ve] da‘vâ eylediğimde anlar dahi kayınatam mezkûr Duka Voyvoda bana hayâtında ba‘zı eşyâ-i ma‘lûme verip ol vechile bende kalmak üzre da‘vâya mütesaddî olmağla beynimizde münâza‘ât-ı kesîre ve muhâsamât-ı şedîde cereyân etmişdi el-hâletü hâzihî mezbûrân ben zevciyyet beynimizde kāime iken mezkûre ( ) işbu mevcûd bi’l-meclis samur kontoş ve bir samur kapaniçe kürk ve iki samur paçası kürk ve bir samur paçası nâfesi serhaddî samur kuyruğu kürk ve bir vaşak yakası kontoş ve sekiz dîbâ kaftan ve üç atlas kaftan ve bir sîm kahve tepsisi ve bir koyun sâ‘ati ve bir paça köhne mintan ve üç donluk dîbâ ve bir top pulsuz kutnî ve bir sırmalı yastık ve dört sîm raht ve üç sırmalı eyer ve bir çift sîm üzengi ve iki semer gaddâre ve bir altın kaplı gaddâre ve iki sîm debbûs ve iki diğimdik ve bir sırmalı zeyn-pûş ve bir Boğdan abayisi ve bir sedefkârlı devât ve bir sırmalı hamrâ ibrişim [ve] iki semer raht ve üç elmas hâtem ve bir elmaslı on iki aded altın düğme ve bir altın kahve tepsisi ve yastıkları ve sâir levâzımı ile mükemmel sırmalı döşek ma‘a yorgan bi tarîki’s-sulh bana teslîm ben dahi ahz u kabz ve tesellüm eylediğimden sonra husûs-ı mîrâsa ve sâir beynimizde cereyân eden mu‘âmelâta müte‘allika da‘vâdan her birini ibrâ ve iskāt etmekle ben dahi kezâlik mezbûrenin terekesine ve bi’l-cümle târih-i kitâba gelinceye her biri ile beynimizde cereyân eden ahz u i‘tâ ve mu‘âmelât-ı şettâya ve hukūk-ı ma‘lûme ve mechûleye müte‘allika [108a] âmme-i da‘vâdan hâlike-i mezbûrenin verese-i mezbûrları ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm her birimizden âhar üzerine da‘vâ sudûr eder ise lede’l-hükkâmi’l-kirâm istimâ‘ olunmaya dedikde gıbbe’t-tasdîki’ş-şer‘î vâki‘ hâli mezbûr Mehmed Efendi mahallinde tahrîr edip ba‘dehû ma‘an irsâl olunan İsmail b. Mehmed ve Mehmed b. Ahmed ile meclis-i şer‘a gelip inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâdis min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Es-Seyyid Mehmed Çelebi b. Cafer, Mustafa Efendi b. Çelebi Efendi el-İmâm, Hasan Çelebi b. Mehmed, es-Seyyid Mehmed Çelebi b. Hüseyin, İbrahim Çelebi b. Abdullah, Durmuş Beşe b. İvaz, Mehmed Beşe b. Şaban, Mehmed b. Hasan, Mehmed Çelebi b. Receb el-Müezzin.