.:: İstanbul Kadı Sicilleri ::.


İstanbul Mahkemesi 211 Numaralı Sicil (H. 1278-1279 / M. 1862-1863)
cilt: 98, sayfa: 45
Hüküm no: 2
Orijinal metin no: [2a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Mirasçılarının ekmekçi esnâfından Kolo v. Yasef’in ölümünden sonra kendilerine miras kalan fırın ve değirmen için mirasçılarının hüccet talebi

Hücceti tashîh olmağla kaydı dahi tashîh olunmuşdur.

Değirmen ihbârı.

Nushateyn. Kaydı ihrâc şüd. Fî 16 Ramazan sene [1]313

Âsitâne-i sa‘âdet-âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ’adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eyleyen i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen zikr-i âtî bir bâb ekmekçi fırınında sâkin iken bundan akdem fevt olan teba‘a-i Devlet-i aliyye’nin Rum milletinden ve ekmekçi esnâfından Kolo v. Yasef v. Vano’nun verâseti her biri teba‘a-i Devlet-i aliyye’den zevce-i metrûkesi Üsküp kasabasında sâkine Kalfo bt. Biço ile sulbî kebîr oğulları esnâf-ı merkūmeden Keço ve Yorgi ve Yuvan ve sulbiye-i kebîre kızları kasaba-i mezkûrede sâkineler Ceryano ve Beyano’ya münhasıra ve tashîh-i mesele-i mirâsları altmış dört sehimden olup sihâm-ı mezkûreden sekiz sehmi zevce-i merkūme Kalfo’ya ve on dörder sehimden kırk iki sehmi merkūmûn Keço ve Yorgi ve Yuvan’a ve yedişer sehimden on dört sehmi dahi merkūmetân Ceryano ve Beyano’ya isâbeti tahakkukdan sonra bâ‘isü’r-rakīm nefsinden asīl ve merkūmun Kalfo ve Keço ve Ceryano ve Beyano taraflarından husûs-ı âti’l-beyânda vekîl-i şer‘îleri merkūm Yorgi meclis-i şer‘-i şerîf-i hatîrde Âsitâne-i aliyye’de ve bilâd-ı selâsede vâki‘ ekmekçi esnâfının kethüdâsı İbrahim Ağa b. Ahmed ve nizâm ustalarından Bahçekapılı Mehmed Hurşid Efendi b. Abdullah ve Hasköylü Yakub Bey b. Ahmed Şakir ve esnâf-ı merkūme yiğitbaşısı es-Seyyid İsmail Efendi b. Mehmed Emin ve Salıcı el-Hâc Ahmed Ağa b. Mehmed hâzır oldukları hâlde bi’l-asâle ve bi’l-verâse ikrâr-ı tâm ve takrîr-i kelâm edip mahmiye-i İstanbul’da Ebü’l-feth Sultan Mehmed Hân aleyhi sicâlü’l-gufrân hazretleri Câmi‘-i şerîfi civârında Karaman-ı Sagīr çarşısında kâin bir tarafdan el-Hâc Said Efendi aşçı dükkânı ve bir tarafdan es-Seyyid Ali Efendi leblebici dükkânı bir tarafdan Ahmed Efendi’nin konağı ve bağçesi ve taraf-ı râbi‘i tarîk-i âm ile mahdûd ve sadr-ı esbak merhûm Pîrî Mehmed Paşa Vakfı musakkafâtından es-Seyyid Ali Efendi’nin bi’l-icâreteyn taht-ı tasarrufunda olan senevî yüz sekiz guruş kirâlı Karaman-ı Sagīr fırını demekle arîf bir bâb ekmekçi fırını derûnunda mevcûde ve fırın-ı mezkûre merbût mahmiye-i mahkiyede Kıztaşı nezdinde Mustafa Bey mahallesinde vâki‘ ma‘lûmü’l-hudûd ve altı horoslu bir bâb mühterik değirmen derunûnda müstahlas beyne’l-esnâf gedik ta‘bîr olunur yirmi dört re’s bârgir ve onlara tâbi‘ sâir âlât-ı lâzime-i ma‘lûmenin on altı re’s bârgir ve onlara isâbet eden âlât-ı sâiresi Mihal v. Karbo’nun yedinde bâ-hüccet mülkü olup mâ‘adâ sekiz re’s bârgir ve onlara îcâb eden âlât-ı sâiresi dahi bin iki yüz altmış üç senesi Cumâdelâhiresi’nin on sekizinci günü târihiyle müverraha İstanbul Mahkemesi sicillinde mukayyed olduğu üzere babam ve mûrisimiz müteveffâ-yı merkūm Kolo’nun hayâtında ile’l-fevt yedinde mülkü ve ba‘de fevtihî benimle müvekkillerim merkūmun Kalfo ve Keço ve Yuvan ve Ceryano ve Beyano’ya ber tashîh-i mezkûr mevrûs olup el-yevm yedimizde mülkümüz olmağla lākin sâlifü’l-beyân sekiz re’s bârgir ve onlara îcâb eden âlât-ı sâire ber-minvâl-i muharrer benimle müvekkillerim merkūmûnun mülkümüz olduğunu nâtık yedimizde sened-i şer‘î olmamağla hakīkat-ı hâl husûs-ı mezkûre vukūf-ı tâmları olan kimesnelerden istihbâr ve suâl olunup haberleri tahrîr ve imlâ ile sâlifü’z-zikr sekiz re’s bârgir ve onlara îcâb eden âlât-ı sâire ber-vech-i meşrûh benimle müvekkillerim merkūmûn Kalfo ve Keço ve Yuvan ve Ceryano ve Beyano’nun yedimizde mülkümüz olduğunu nâtık kıbel-i şer‘den bir kıt‘a hüccet-i şer‘iyye i‘tâ buyurulmak murâdımdır deyu bi’l-asâle ve bi’l-vekâle istid‘â ettikde hâl asîl ve vekîl-i merkūm Yorgi’nin bâlâda bast ve beyân eylediği minvâl-i muharrer üzere olduğunu husûs-ı mezkûre vukūf-ı tâmları olan esnâf-ı hâzirûn-ı merkūmûn alâ tarîki’ş-şehâde haber vermeleriyle vâki‘-i hâl hıfzan li’l-makāl işbu vesîka-i enîka ketb ü imlâ olundu.

Fî 6 Şevval sene 1278

Şuhûdü’l-hâl: Muhzır Feyzullah Ağa b. ( ), Muhzır el-Hâc Salih Ağa b.( ), Muhzır el-Hâc Yusuf Ağa b. ( ), Muhzır Şakir Ağa b. ( ) ve gayruhum