İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 46 Hüküm no: 3 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Efendi b. Seyyid Mustafa’nın tütüncü dükkânındaki hisselerini satması Tütüncü gediği mübâya‘ası 15000 guruş Kezâlik mahmiye-i İstanbul’da vâki‘ Duhân Gümrüğü’nde sâkin es-Seyyid Mehmed Efendi b. es-Seyyid Mustafa meclis-i şer‘-i şerîf-i enverde li-ebeveyn karındaşı bâ‘isü’l-kitâb es-Seyyid Ahmed Efendi mahzarında mezbûr es-Seyyid Mehmed Efendi’nin sulbî kebîr oğlu es-Seyyid Mehmed İzzet Efendi ve li-ebeveyn er karındaşı oğulları es-Seyyid Mustafa Şemseddin Efendi ve es-Seyyid İbrahim Besim Efendi ibneyi’l-müteveffâ es-Seyyid Aziz taraflarından husûs-ı âti’l-beyânda tasdîka vekîl-i şer‘îleri tütüncü esnâfı kethüdâ vekîli Ahmed Efendi b. Osman ve esnâf-ı merkūmenin kethüdâsı el-Hâc Mehmed Latif efendi ile mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel vekîlleri esnâf-ı merkūme yazıcısı es-Seyyid Ahmed Efendi b. el-Hâc Mehmed hâzır oldukları hâlde ikrâr-ı tâm ve takrîr-i kelâm edip sâlifü’l-beyân Duhân Gümrüğü ittisâlinde köşede vâki‘ bir tarafdan Gümrük-i mezkûr ve bir taraftan Çorlulu Kostandi’nin tütüncü mağazası ve tarafeyni tarîk-i âm ile mahdûd ve Ayasofya-i Kebîr Câmi’-i şerîfi evkāfı müsakkafâtından benimle mezbûr Ahmed Efendi ve müvekkilân-ı mezbûrân es-Seyyid Mustafa Şemseddin Efendi ve es-Seyyid İbrahim Besim Efendi’nin ale’l-iştirâk taht-ı tasarrufumuzda olan şehrîye yirmi guruş kirâ-yı kadîmelüEshâm Muhâsebesi kaleminde Artin ve Anparsum isimlerine mukayyed iki bâb odayı muhtevî beş kepenk bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yedimde olup bin iki yüz altmış senesi Zilhicceti’ş-şerîfesinin yirminci günü târihiyle müverraha ve ol târihde Dârü’l-hilâfeti’l-aliyye kādısı olan Paşmakçızâde es-Seyyid İbrahim Efendi merhûmun imzâ ve hatemi? hâviye işbu bir kıt‘a hüccet-i şer‘iyye ve kethüdâ-yı merkūmun takdîm eylediği bir kıt‘a ilmühaber mantûklarınca akd-i âti’z-zikrin sudûruna değin yedimde müstakillen mülk ve hakkım olmağla ben ber-minvâl-i muharrer mâlik olduğum âlât-ı gedik-i mezkûrun sülüs hisse-i şâyi‘asını be-safka-i vâhide beş bin guruşa karındaşım mezbûr es-Seyyid Ahmed Efendi’ye ve diğer sülüs hisse-i şâyi‘asını kezâlik be-safka-i vâhide beş bin guruşa oğlum müvekkil-i mezbûr es-Seyyid Mehmed İzzet Efendi’ye ve âhar sülüs hisse-i şâyi‘asını dahi kezâlik safka-i vâhide ile beş bin guruşa müvekkilân-ı mezbûrân es-Seyyid Mustafa Şemseddin Efendi ve es-Seyyid İbrahim Besim Efendi’ye seviyyen tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile bey‘ ve temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabz u kabûl eylediklerinden sonra semenleri olan cem‘an on beş bin guruşu tamamen bana def‘ u teslîm ben dahi yedlerinden bi’t-tamâm ve’l-kemâl ahz u kabz edip mebî’-i mezkûrların tağrîr ve gabnlarına müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik fîmâ-ba’d âlât-ı gedik-i mezkûrede benim aslâ ve kat‘â alâka ve medhalim kalmayıp âlât-ı gedik-i mezkûrun sülüs hisse-i şâyi‘ası karındaşım mezbur es-Seyyid Ahmed Efendi’nin ve diğer sülüs hisse-i şâyi‘ası oğlum müvekkil-i mezbûr es-Seyyid Mehmed İzzet Efendi’nin ve âhar sülüs hisse-i şâyi‘ası dahi müvekkilân-ı mezbûrân es-Seyyid Mustafa Şemseddin Efendi ve es-Seyyid İbrahim Besim Efendi’ye seviyyen mülk-i müşterâları ve hakk-ı sırfları olmuşdur dedikde gıbbe’t-tesâdukı’ş-şer‘î. Fî 16 Şevval sene 1278 Şuhûdü’l-hâl: Muhzır Feyzullah Ağa b. ( ), Muhzır el-Hâc Salih Ağa b. ( ), Muhzır el-Hâc Yusuf Ağa b. ( ), Muhzır Mustafa Ağa b. ( ) ve gayruhum