İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 48 Hüküm no: 4 Orijinal metin no: [2a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havyarcı esnâfından Yuvan v. Varsam’ın tütüncü dükkânındaki hisselerinin bir kısmını Bakkal Arabsunlu Nikola v. Hıristo’ya satması Tütüncü gediği mübâya‘ası 1200 guruş Kezâlik teba‘a-i Devlet-i aliyye’nin Rum milletinden ve havyarcı esnâfından Yuvan v. Varsam meclis-i şer‘-i hatîrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan bâ‘isü’r-rakīm Bakkal Arabsunlu Nikola v. Hıristo muvâcehesinde Âsitâne-i aliyyede vâki‘ tütüncü es[nâfı]nın kethüdâsı el-Hâc Mehmed Latif Efendi ile mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel vekîlleri kethüdâ vekîli Ahmed Efendi b. Osman hâzır olduğu hâlde takrîr-i kelâm edip mahmiye-i İstanbul hısnı ebvâbından Edirnekapısı dâhilinde Ka‘riye Ali Paşa mahallesinde Sultan hamamı kurbünde helvâcı dükkânı karşısında vâki‘ iki tarafdan el-Hâc Mehmed Ağa’nın berber dükkânı bahçesi ve bir tarafdan benim bakkal dükkânım ve taraf-ı râbi‘i tarîk-i âm ile mahdûd Ayasofya-i Kebîr Câmi’-i şerîfi evkāfı mütevellisi merhûm Mustafa Ağa Vakfı müsakkafâtından bâ-temessük-i mütevelli bi’l-icâreteyn taht-ı tasarrufumda olan şehriye yüz pare kirâ-yı kadîmelü Eshâm Muhâsebesi kaleminde İsador isminde mukayyed bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yedimde olup bin iki yüz yetmiş bir senesi Recebü’l-müreccebi selhi tarihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan merhûm Ahmed Şükrü Efendi’nin imzâ ve hatemini hâviye işbu bir kıt‘a mübâya‘a hücceti ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca akd-i âti’z-zikrin sudûruna değin yedimde mülk ve hakkım olmağla ben ber-minvâl-i muharrer mâlik olduğum âlât-ı gedik-i mezkûrun selâse-i erbâ‘ hisse-i şâyi‘asını yedimde bi’l-ibkā mâ‘adâ rub‘hisse-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bin iki yüz guruşa merkūm Nikola’ya bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm bin iki yüz guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm rub‘ hisse-i şâyi‘a-i âlât-ı gedik-i mezkûrde benim aslâ ve kat‘â alâka ve medhalim kalmayıp merkūm Nikola’nın mülk-i müşterâsı ve hakk-ı sırfı olmuşdur dedikde gıbbe. Fî 13 Şevval sene 1278 Şuhûdü’l-hâl: Muhzır Feyzullah Ağa b. ( ), Muhzır el-Hâc Salih Ağa b. ( ), Muhzır Mustafa Ağa b. ( )Muhzır Şakir Ağa b. ( ), ve gayruhum