İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 49 Hüküm no: 5 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu esnâfından Nikola v. Yorgi’nin uncu değirmenindeki hisselerini ortağı İstefan v. Nikola’ya satması Uncu değirmeni 12500 guruş Kezâlik teba‘a-i Devlet-i aliyye’nin Rum milletinden ve uncu esnâfından Nikola v. Yorgi meclis-i şer‘-i hatîrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan esnâf-ı merkūmeden bâ‘isü’r-rakīm İstefan v. Nikola muvâcehesinde Âsitâne-i aliyye ve bilâd-ı selâsede vâki‘ ekmekçi ve uncu esnâfının kethüdâsı İbrahim Ağa b. Ahmed ile mazbûtü’l-esâmî nizâm ustaları taraflarından mürsel vekilleri esnâf-ı merkūme yiğitbaşısı es-Seyyid İsmail Efendi b. es-Seyyid Mehmed Emin hâzır olduğu hâlde ikrâr-ı tâm ve takrîr-i kelâm edip mahmiye-i İstanbul hısnı ebvâbından Edirne kapısı hâricinde Emir Ahmed el-Buhârî mahallesinde vâki‘ bir tarafdan tarîk-i âm ve bir tarafdan mekteb arsası ve bir tarafdan Kosti değirmeni ve bir tarafdan benimle merkūm İstefan’ın tasarrufumuzda olan arsa ile mahdûd müşârün-ileyh Emir Ahmed el-Buhârî hazretleri damadı eş-Şeyh Mahmud Efendi Vakfı müsakkafâtından benimle merkūm İstefan’ın bâ-temessük-i mütevelli bi’l-icâreteyn taht-ı tasarrufumda olan şehriye on beş guruş kirâlı terbî‘ân dört yüz seksen zirâ‘ arsa üzerinde mebni dört horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur on altı re’s bârgir ve onlara tâbi‘ sâir âlât-ı lâzime-i ma‘lûme yedimizde olup bin iki yüz yetmiş altı senesi şehr-i Rebi’ulâhiri’nin yedinci günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan es-Seyyid Hüseyin Hulusi Efendi merhûmun imzâ ve hateminihâviye işbu bir kıt‘a mübâya‘a hücceti nâtıka olduğu üzere benimle merkūm İstefan’ın münâsefeten yedimizde mülkümüz olmakla ben âlât-ı gedik-i mezkûrdan akd-i âti’z-zikrin sudûruna değin yedimde ber-minvâl-i muharrer mâlik olduğum sekiz re’s bârgir ve onlara isâbet eden âlât-ı sâireyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-ilmühaber şerîkim merkūm İstefan’a on iki bin beş yüz guruşa bey‘ ve temlîk ve vech-i lâyıkıyla teslîm eyledikde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm on iki bin beş yüz guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ ü ıskāt eyledik ba‘de’l-yevm sâlifü’l-beyân sekiz re’s bârgir ve onlara isâbet eden âlât-ı sâirede benim aslan ve kat‘ân alâka ve medhalim kalmayıp mecmû‘ âlât-ı gedik mezkûr merkūm İstefan’ın mülk-i mahzı ve hakk-ı sırfı olmuşdur dedikde gıbbe. Fî 8 Şevval sene 1278 Şuhûdü’l-hâl: Muhzır Feyzullah Ağa b. ( ), Muhzır el-Hâc Yusuf Ağa b. ( ), Muhzır Şakir Ağa b. ( ), Muhzır Mustafa Ağa b. ( ), ve gayruhum