Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 519 Hüküm no: 624 Orijinal metin no: [108a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ali b. Ebûbekir üzerine küçük oğlu Ebûbekir için nafaka takdiri Mahmiye-i İstanbul’da Âşık Paşa mahallesi sâkinelerinden işbu bâ‘is[etü] hâze’l-kitâb Safiye bt. Mehmed nâm hâtun meclis-i şer‘-i şerîfde zevc-i muhâlı‘ı el-Hâc Ali b. Ebûbekir mahzarında takrîr-i kelâm ve bast-ı merâm edip mezbûr el-Hâc Ali’nin firâşından hâsıl ve benden mütevellid sadrî sagīr oğlum Ebûbekir’in nafaka ve kisve-bahâ ve sâir levâzım-ı mühimmesi için babası mezbûr el-Hâc Ali üzerine kadr-i ma‘rûf nafaka farz ve takdîr olunmak matlûbumdur dedikde hâkim-i muvakki‘-i sadr-ı kitâb -tûbâ-lehû ve hüsnü me’âb- hazretleri dahi sagīr-i mezbûrun nafaka ve kisve-bahâ ve sâir levâzım-ı mühimmesi için babası mezbûr el-Hâc Ali kendi rızâsıyla târih-i kitâbdan külle yevm beş akçe farz ve takdîr edip meblağ-ı mefrûz-ı mezbûru sagīr-i mezbûrun nafaka ve kisve-bahâ ve sâir levâzım-ı mühimmesi için harc ve sarfa ve lede’z-zarûre istidâneye ve inde’z-zafer babası mezbûr el-Hâc Ali üzerine rücû‘a mezbûre Safiye Hâtun’a izin verilmeğin mâ hüve’l-vâki‘ bi’t-taleb ketb olundu. Fi’l-yevmi’l-âşir min Ramazâni’l-mübârek li sene seb‘a ve tis‘în ve elf. Şuhûdü’l-hâl: İbrahim [b.] Ahmed, Mehmed [b.] İdris, Mustafa Çelebi b. Ahmed, Ali [b.] Bâli, Hasan [b.] Mehmed, Ebûbekir b. Hüseyin, Hüseyin [b.] Mehmed, Mahmud b. Mehmed.