Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 520 Hüküm no: 625 Orijinal metin no: [108a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Beşe b. Bayram’ın mirasının mirasçılara teslim ve vasînin zimmetinin ibrâ edildiği Mahmiye-i İstanbul’da Hızır Bey mahallesi ahâlîsinden olup tarîk-i hacc-ı şerîfde Karaman Ereğlisi’nde vefât eden İbrahim Beşe b. Bayram’ın verâseti zevce-i menkûhası Sâliha bt. Ahmed ile ümm-i veledi Müstakīme bt. Abdullah’dan mütevellide sagīre kızı Emetullah’a münhasıra olup kable’l-kısme mezbûre Emetullah dahi fevt olup verâseti vâlidesi mezbûre Müstakīme’ye münhasıra olduğu şer‘an zâhir ve müte‘ayyin oldukdan sonra mezbûr Müstakīme zâtı ma‘rifet-i şer‘iyye ile ârifân olan Arabacılar’da bakkal olan Ali Beşe b. Hüseyin ve Edirnekapısı kurbunda sâkin olup kezâlik Arabacılar sûkuyla kalburcu Hasan Beşe b. Himmet nâm kimesneler ta‘rîfleriyle mu‘arrefe oldukdan sonra meclis-i şer‘-i şerîf-i enverde yine mahmiye-i mezbûrede Âşık Paşa’da sâkin olup müteveffâ-yı mezbûrun vasiyy-i muhtârı olmağla terekesine vâzı‘ü’l-yed eden işbu bâ‘isü’l-kitâb el-Hâc Ali b. Musa mahzarında bi tav‘ihâ ikrâr ve takrîr-i kelâm [edip] kızım mezkûre Emetullah’ın babası müteveffâ-yı mezbûrdan irsen isâbet edip ba‘de vefâtihâ bana bi’l-irsi’ş-şer‘î isâbet eden meblağ akçeye vaz‘-ı yed eden [108b] vasiyy-i mezbûrdan taleb ve ahz ve bana îsâle hâlâ zevcim olan işbu hâzır bi’l-meclis Mahmud b. Süleyman’ı vekîl eylediğimde ol dahi ba‘de kabûli’l-vekâle müteveffâ-yı mezbûrun hac için vasiyyeti üzre ihrâc olunan meblağdan mâ‘adâ mezbûr el-Hâc Ali’nin bi’l-vesâye tereke-i müteveffâ-yı mezbûrdan makbûzunda ber mûceb-i defter-i kassâm bi’l-irsi’ş-şer‘î bana isâbet eden kırk bin altı yüz seksen dört akçe hakkım[ı] vekâleten mezkûr el-Hâc Ali’den kabz ve bana teslîm ben dahi bi’t-tamâm ve’l-kemâl ahz u kabz edip tereke-i müteveffâ-yı mezbûrdan vasiyy-i mezbûr yedinden zimmetinde bir akçe ve bir habbe kalmayıp husûs-ı mezbûra müte‘allika mezbûr el-Hâc Ali ile da‘vâ ve nizâ‘ım kalmamışdır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Mustafa Çelebi sâkin-i Acıçeşme, Abdullah Efendi, Mahmud b. Süleyman, Hasan b. Himmet.