İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 50 Hüküm no: 6 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Münevvere Hanım bt. İsmail’in vasiyeti ve Seyyid Mehmed Said Efendi b. Seyyid Ahmed’i vasi ataması Husûs ile vasiyyet Husûs-ı âti’l-beyânın mahallinde ketb ü tahrîri için cânib-i şerî‘at-ı garrâdan bi’l-iltimâs me’zûnen irsâl olunan Kâtib es-Seyyid Hafız Osman Nuri Efendi mahmiye-i İstanbul’da Ebû’l-feth Sultan Mehmed Hân-ı Gâzî aleyhi-rahmetü ve’l-gufrân hazretleri Câmi‘-i şerîfi kurbünde Kameriyeli Mescid nâm-ı diğer Mimar Sinan mahallesinde vâki‘ Teftîş-i Evkāf mahkemesi mümeyyiz-i evveli eşrâf-ı kuzâtdan meveddetlü es-Seyyid Mehmed Said Efendi b. es-Seyyid Ahmed’in sâkin olduğu menziline varıp zeyl-i kitâbda muharrerü’l-esâmî müslimîn huzûrlarında akd-i meclis-i şer‘-i nebevî etdikde mahmiye-i merkūmede Keçeciler kurbünde Keçeci Pîrî mahallesinde sâkine ve zâtı müslimûn-ı merkūmûn ta‘rîfleriyle mu‘arrefe olan Münevvere Senûre Hanım bt. İsmail meclis-i ma‘kūd-ı mezkûrde zikri âtî vesâyâ-yı mu‘ayyene ve gayr-i mu‘ayyenesine vasiyy-i muhtâr nasb ve ihtiyâr eylediği işbu bâ’is-i hâze’l-kitâb mûmâ-ileyh es-Seyyid Mehmed Said Efendi mahzarında ikrâr-ı tâm ve takrîr-i kelâm edip ben bi-emri’llâhi te’âlâ vefât eylediğimde cemî‘ terekem ve zimem-i nâsda olan hukūku mahz u kabz olunup ben zât-ı zevc olmamamla evvelâ sünnet-i seniyye-i nebevîyye üzere techîz ve tekfîn ve levâzım-ı defnim görülüp duyûn-ı müsbetem zuhûr eder ise ba‘de’l-edâ bâkī kalan terekemin sülüsü ifrâz ve sülüs-i mezkûrdan sekiz yüz guruş iskāt-ı salât-ı fâ’item ve kefâret-i yemin ve savm ve nuzûrat-ı sâirem için ber-nehc -i şer‘î ba‘de’d-devr fukarâ-i müslimîne tasadduk oluna ve yine sülüs-i mezkûrdan üç yüz guruş harc u sarfla tabh-ı helvâ ve it’âm-ı fukarâ oluna ve huffâz-ı kirâmdan bir zâta hatm-i şerîf tilâvet etdirilip hâsıl olan sevâbını benim ve ebeveynim ve sâir mü’minîn mü’minât ervâhımıza ba‘de-l ihdâ mukābelesinde sülüs-i mezkûrdan yüz elli guruş verile ve yine sülüs-i mezkûrdan dört yüz elli guruş harc u sarfla tabh-ı lokma ve it’âm-ı fukarâ oluna ve yine sülüs-i mezkûrdan bin guruş harc u sarfla ta‘mîr-i kabrim görüle ve sülüs-i mezkûrdan her ne fazla kalır ise fazla-i merkūme vasiyy-i muhtârım mûmâ-ileyh re’yi ile vücûh-ı birr u hayra harc u sarf oluna ve sülüsân-ı terekem dahi veresem beynlerinde alâ mâ- farazallâhu’l-alîmü’l-hakîm tevzî‘ ve taksîm oluna deyu vasiyyet ve tenfîzine mûmâ-ileyh es-Seyyid Mehmed Said Efendi’yi vasiyy-i muhtâr nasb ve ihtiyâr eylediğimde ol dahi vesâyet-i mezkûreyi kabûl ve hizmet-i lâzimesini vaktinde kemâ yenbagi edâya ta‘ahhüd ve iltizâm eyledi dedikde gıbbe’t-tasdîki’ş-şer‘î vâki‘ hâli kâtib-i mûmâ-ileyh ilh. Fî 16 Şevval sene 1278 Şuhûdü’l-hâl: Mahalle-i merkūme muhtâr-ı evveli es-Seyyid Hüseyin Efendi b. el-Hâc Mehmed Ali, Mârru’z-zikr Keçeci Pîrî mahallesi imâmı el-Hâc Hasan Efendi b. el-Hâc Hüseyin, Kısmet-i Askerîye mahkemesi ketebesinden Numan Efendi b. Mehmed, Mahkeme-i merkūme ketebesinden Mehmed Tahir Efendi b. Ahmed, Mevâlî-i izâmdan Murad Efendizâde fazîletlü Mehmed Emin Efendi, Çukadâr, Muhzır el-Hâc Yusuf Ağa b. ( ),, ve gayruhum