İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 53 Hüküm no: 8 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havyarcı esnâfından Mina v. el-müteveffâ Yuvan’ın havyarcı dükkânındaki hisselerini Hacı Yanoğlu Aleksi v. Hacı Yani’ye satması Havyarcı bakkalı gediği 11000 guruş Kezâlik teba‘a-i Devlet-i aliyye’nin Rum milletinden ve havyarcı esnâfından Mina v. el-müteveffâ Yuvan v. Marko oğlu Togofilos meclis-i şer‘-i şerîf-i hatîrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan esnâf-ı mezkûreden bâ‘isü’r-rakīm Hacı Yanoğlu Aleksi v. Hacı Yani muvâcehesinde esnâf-ı mezkûre kethüdâsı Yuvan v. Paskal tarafından mürsel vekîli Sarafim v. Yorgi ve esnâfından Nikola v. Vasil ve Vasil v. Sarafim ve Nikola v. Yosef ve Aleksi v. Adam ve Kilimandos v. Nikola ve Gavril v. Yorgi ve Hıristo v. İlya ve Yuvan v. Anaştaş hâzır oldukları hâlde ikrâr-ı tâm ve takrîr-i kelâm edip mahrûse-i Galata hısnı ebvâbından Balık Pazarı kapısı hâricinde kâin bir tarafdan Kazdağlı dükkânı demekle arîf Mustafa Ağa’nın havyarcı bakkal dükkânı ve bir tarafdan Anderya’nın Tenevvürcüoğlu dükkânı demekle arîf balıkçı dükkânı ve bir tarafdan leb-i deryâ ve taraf-ı râbi‘i tarîk-i âm ile mahdûd merhûm İbrahim Paşa Vakfı müsakkafâtından esnâf-ı merkūmeden gāib ani’l-meclis Yuvan v. Paskal’ın bâ-temessük-i mütevelli bi’l-icâreteyn taht-ı tasarrufunda olan senevî üç yüz on sekiz guruş kirâ-yı kadîmelüAngeli dükkânı demekle arîf bir bâb havyarcı bakkalı dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla yetmiş beş sehm hisse-i şâyi‘ası cennet-mekân-ı adn-âşiyân merhûm ve mağfiret-nişân Sultan Mahmud Hân-ı Sânî aleyhi-rahmetü men enzele seb‘a’l-mesânî hazretlerinin evkāf-ı celîleleri müstagallâtından olarak kırk sehm hisse-i şâyi‘ası Anderya v. Tanaş’ın ve on sehm hisse-i şâyi‘ası merkūm Yuvan’ın ve yedi sehm hisse-i şâyi‘ası Papas Hırisantos v. Yuvan’ın ve on sekiz sehm hisse-i şâyi‘ası Paskal v. Yuvan’ın derdest olan bir kıt‘a arzuhâl hâmişinde mukayyed defter-i evkāf-ı celîle-i müşârün-ileyhden muhrec derkenâr mantûkunca bi’l-icâreteyn taht-ı tasarruflarında ve on üç sehm hisse-i şâyi‘ası merkūm Hırisantos’un ve beş sehm hisse-i şâyi‘ası Ligor’un ve on sehm hisse-i şayi‘ası Ohannes v. Serkis’in ve yedi sehm hisse-i şâyi‘sı Nikola v. Tanaş’ın ber-vech-i mülkiyet yedlerinde mülkleri olup ma‘adâ on sehm hisse-i şâyi‘sının beş sehm hisse-i şâyi‘ası benim ve âhar beş sehm hisse-i şâyi‘ası li-ebeveyn kız karındaşlarım Despina ve Katerina’nın yedimde olup işbu şehr-i hâlin yirmi ikinci günü târihiyle müverraha İstanbul Mahkemesi’nden verilen işbu bir kıt‘a hüccet-i şer‘iyye mantûkunca yedimizde irsen mülkümüz olmağla ben âlât-ı gedik-i mezkûrdan akd-i âti’z-zikrin sudûruna değin mâlik olduğum beş sehm hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve ve safka-i vâhide ile bâ-izn-i şürekâ ve bâ-ilmühaber on bir bin guruşa merkūm Aleksi’ye bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm on bir bin guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrun beş sehm hisse-i şâyi‘a-i merkūmesinde benim aslâ ve kat‘â alâka ve medhalim kalmayıp merkūm Aleksi’nin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î. Fî 23 Zilka‘de sene 1278 Şuhûdü’l-hâl: Muhzır Feyzullah Ağa b. ( ), Muhzır Mustafa Ağa b. ( ), Muhzır Ahmed Ağa b. ( ), Muhzır Mehmed Ağa b. ( ), ve gayruhum