İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 54 Hüküm no: 9 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mirasçılarının Yuvan v. Marko oğlu Togofolis’in ölümünden sonra kendilerine miras kalan havyar dükkanındaki hisselerinin mülkleri olduğunu gösterecek hüccet talebi Havyarcı bakkalı gediği ihbârı Kezâlik vilâyet-i Anadolu’da Arabsun kazâsına tâbi‘ Senasun? karyesinde sâkin iken bundan akdem fevt olan teba‘a-i Devlet-i aliyye’nin Rum milletinden ve havyarcı bakkalı esnâfından Yuvan v. Marko oğlu Togofilos v. Adam’ın verâseti her biri teba‘a-i Devlet-i aliyye’den sulbî kebîr oğlu esnâf-ı mezkûreden Mina ve sulbiye-i kebîre kızları Despina ve Katerina’ya münhasıra ve tashîh-i mes’ele-i mîrâsları dört sehimden olup sihâm-ı mezkûreden iki sehmi merkūm Mina’ya ve birer sehimden iki sehmi dahi merkūmetân Despina ve Katerina’ya isâbeti lede’ş-şer‘i’l-enver zâhir ve mütehakkık oldukdan sonra merkūm Mina merkūmetân Despina ve Katerina taraflarından husûs-ı âti’z-zikrde vekîl-i şer‘îleri teba‘a-i Devlet-i aliyye’nin Rum milletinden ve esnâf-ı mezkûreden Yorgi v. İlya hâzır olduğu hâlde meclis-i şer‘-i şerîf-i hatîrde esnâf-ı merkūme kethüdâsı Yuvan v. Paskal tarafından mürsel vekîli Sarafim v. Yorgi ve esnâfdan Nikola v. Vasil ve Vasil v. Sarafim ve Nikola v. Yosef ve Aleksi v. Adam ve Kilimandos v. Nikola ve Gavril v. Yorgi ve Hıristo v. İlya ve Yuvan v. Anaştaş hâzır oldukları hâlde bi’l-verâse takrîr-i kelâm ve ta‘bîr ani’l-merâm edip mahrûse-i Galata hısnı ebvâbından Balık Pazarı kapısı hâricinde kâin bir tarafdan Kazdağlı dükkânı demekle arîf Mustafa Ağa’nın havyarcı bakkalı dükkânı ve bir tarafdan Anderya’nın Tenevvürcüoğlu dükkânı demekle arîf balıkçı dükkânı ve bir tarafdan leb-i deryâ ve taraf-ı râbi‘i tarîk-i âm ile mahdûd merhûm İbrahim Paşa Vakfı müsakkafâtından esnâf-ı merkūmeden gāib ani’l-meclis Yuvan v. Paskal’ın bâ-temessük-i mütevelli bi’l-icâreteyn taht-ı tasarrufunda olan senevî üç yüz on sekiz guruş kirâ-yı kadîmelüAngeli dükkânı demekle arîf bir bâb havyarcı bakkal dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla yetmiş beş sehm hisse-i şâyi‘ası cennet mekân-ı adn-âşiyân merhûm ve mağfiret-nişân Sultan Mahmud Hân-ı Sânî aleyhi-rahmetü men enzele seb‘a’l-mesânî hazretlerinin evkāf-ı celîleleri müstagallâtından olarak kırk sehm hisse-i şâyi‘ası Anderya v. Tanaş’ın ve on sehm hisse-i şâyi‘ası merkūm Yuvan’ın ve yedi sehm hisse-i şâyi‘ası Papas Hırisantos v. Yuvan’ın ve on sekiz sehm hisse-i şâyi‘ası Paskal v. Yuvan’ın derdest olan bir kıt‘a arzuhâl hâmişinde mukayyed defter-i evkāf-ı celîle-i müşârün-ileyhden muhrec derkenâr mantûkunca bi’l-icâreteyn taht-ı tasarruflarında ve on üç sehm hisse-i şâyi‘ası merkūm Hırisantos’un ve beş sehm hisse-i şâyi‘ası Ligor’un ve on sehm hisse-i şâyi‘ası Ohannes v. Serkiz’in ve yedi sehm hisse-i şâyi‘ası Nikola v. Tanaş’ın ber-vech-i mülkiyet yedlerinde mülkleri olup mâ‘adâ on sehm hisse-i şâyi‘ası dahi babam müteveffâ-yı merkū[m] Yuvan’ın hayâtında yedinde olup bin iki yüz otuz dokuz senesi Zilhicceti’ş-şerîfesinin yirminci günü târihiyle müverraha ve ol târihde mahrûse-i mezkûre kādısı olan İmamzâde es-Seyyid Mehmed Şakir Efendi merhûmun imzâ ve hatemini hâviye işbu bir kıt‘a mübâya‘a hücceti nâtık olduğu üzere ile’l-fevt yedinde mülkü ve ba‘de fevtihî on sehm hisse-i şâyi‘a-i âlât-ı gedik-i mezkûrun beş sehm hisse-i şâyi‘ası bana ve beş sehm hisse-i şâyi‘ası dahi müvekkiletân-ı merkūmetân Despina ve Katerina’ya ber tashîh-i mezkûr mevrûs olup ol-vechile on sehm hisse-i şâyi‘a-i âlât-ı gedik-i mezkûr benimle müvekkiletân-ı merkūmetânın el-yevm yedimizde mülkümüz olup ve kethüdâ-yı merkūm dahi bir kıt‘a ilmühaber vermiş ise de on sehm hisse-i şâyi‘a-i âlât-ı gedik-i mezkûr ber-vech-i meşrûh benimle müvekkiletân-ı merkūmetânın mülkümüz olduğunu nâtık yedimizde sened-i şer‘î olmamağla hakīkat-i hâl vukūf-ı tâmları olan kimesnelerden istihbâr ve suâl olunup haberleri tahrîr ve imlâ ile kıbel-i şer‘den on sehm hisse-i şâyi‘a-i âlât-ı gedik-i mezkûr ber-minvâl-i muharrer benimle müvekkiletân-ı merkūmetân Despina ve Katerina’nın mülkümüz olduğunu mübeyyin yedimize bir kıt‘a hüccet-i şer‘iyye i‘tâ buyurulmak murâdımızdır deyu hâzır vekîl-i merkūm Yorgi ile ma‘an bi’l-asâle ve bi’l-vekâle istid‘â etmeleriyle hâl asîl ve vekîl-i merkūmân Mina ve Yorgi’nin bâlâda bast ve beyân eyledikleri minvâl üzere olduğunu husûs-ı mezkûre vukūf-ı tâmları olan esnâf-ı hâzirûn-ı merkūmûn alâ tarîki’ş-şehâde haber vermeleriyle vâki‘-i hâl hıfzan li’l-makāl işbu vesîka-i enîka ketb ü imlâ olundu. Fî 28 Zilka‘de sene 1278 Şuhûdü’l-hâl: Muhzır Feyzullah Ağa b. ( ), Muhzır Mehmed Ağa b. ( ), Muhzır Mustafa Aği b. ( ), Muhzır Ahmed Ağa b. ( ), Muhzır Ali Ağa b. ( ), ve gayruhum