İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 57 Hüküm no: 11 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden tüccardan Dimitraki v. Mihal’in mirasçılarına kalan şerbethâne hisselerinin Katolik milleti nisvânından Takohi bt. Agop’a satılması Şerbethâne gediği 40000 guruş Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen mahrûse-i Galata hâricinde Beyoğlu civârında Hüseyin Ağa mahallesinde sâkin iken bundan mukaddem fevt olan teba‘a-i Devlet-i aliyye’nin Rum milletinden tüccârdan Kanozlu Dimitraki v. Mihal v. Adam’ın verâseti her biri teba‘a-i Devlet-i aliyye’den zevce-i metrûkesi Diyalefti bt. Yorgaki v. Adam ile zevce-i merkūmeden mütevellidler sulbî kebîr oğulları Kozma ve Odisef ve Mihal ve Yorgaki ve Dimyanos ve sulbiye-i kebîre kızları Fotni ve Kadınko ve Maryonika ve Kaliyopi ve Penelopi ve Aspasya ve Eleniko’ya münhasıra olduğu bi’l-ihbâr lede’ş-şer‘i’l enver zahir ve mütehakkık olduktan sonra merkūmûn Kozma ve Mihal ve Yorgaki ve Dimyanos ve merkūmât Diyalefti ve Fotni ve Kadınko ve Maryonika ve Kaliyopi ve Penelopi ve Espasya ve Eleniko taraflarından husûs-ı âti’l-beyânda vekîlleri olduğu şahıslarını bilirler teba‘a-i Devlet-i aliyye’den mahalle-i mezkûre muhbiri Nikolaki v. Apostol ve şerbethâneci esnâfından Vartan v. Artin şehâdetleriyle ber-nehc -i şer‘î sâbit olan teba‘a-i Devlet-i aliyye’nin Rum milletinden ve esnâf-ı merkūmenin mârrü’l-beyân Beyoğlu kolu ustabaşısı Dülbendcioğlu Andon v. Ohannes bi’l-vekâle ve merkūm Odisef dahi bi’l-asâle hâzır oldukları hâlde meclis-i şer‘-i şerîf-i hatîrde Tersâne-i âmire tabîblerinden Palviçoğlu Kirkor’un zevcesi teba‘a-i Devlet-i aliyye’nin Katolik milleti nisvânından ol dahi bâ-ilmühaber mütehakkık olan bâ‘isü’r-rakīm Takohi bt. Agop tarafından husûs-ı âti’l-beyânda tasdîka vekîl-i şer‘îsi teba‘a-i Devlet-i aliyye’den Hazine-i Evkāf-ı hümâyûn sarrâfı yazıcısı Oseb v. Kirkor muvâcehesinde esnâf-ı merkūme ustabaşılarından Üsküdarlı Hacı Ohannes v. Serope hâzır olduğu hâlde her biri bi’l-asâle ve bi’l-vekâle ikrâr-ı tâm ve takrîr-i kelâm edip sâlifü’l-beyân Beyoğlu civârında Kamer Hatun mahallesinde Çukur nâm mahalde bakkal dükkânı karşısında vâki‘ bir tarafdan Papas Oseb v. Ohannes menzili ve ba‘zen Anaştaş menzili ve bir tarafdan Ohannes menzili ve ba‘zen Fıçıcı Kostanti mülk menzili ve ba‘zen Sıvacı Evasdaki ve zevcesi Takohi arsaları ve ba‘zen Merkeb’in menzili ve tarafeyni tarîk-i âm ile mahdûd mahrûse-i mezkûre voyvodası esbak el-Hâc Ahmed Ağa mahdûmu Müderris el-Hâc Hüseyin Efendi vakıfları müsakkafâtından müvekkile-i merkūme Takohi’nin bâ-temessük-i mütevelli bi’l-icâreteyn taht-ı tasarrufunda olan şehriye elli guruş kirâlı İlya nâm-ı diğer İkikapılı şerbethânesi demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla altmışar sehm hisse-i şâyi‘ası karındaşımız hâzır-ı merkūm Odisef’in bin iki yüz yetmiş altı senesi Cumâdelâhiresi’nin ikinci günü târihiyle müverrah ve ol târihde rüsûm-i zecriye nâzırı olan sa‘âdetlü Nazif Beyefendi’nin mührüyle memhûr işbu bir kıt‘a sûret mantûkunca yedinde mülkü olup mâ‘adâ altmışar sehm hisse-i şâyi‘ası dahi babamız müteveffâ-yı merkūm Dimitraki’nin hâyatında ile’l-fevt yedinde mülkü ve ba‘de fevtihî bizimle karındaşımız hâzır-ı merkūm Odisef ve müvekkilât-ı merkūmat Diyalefti ve Fotni ve Kadınko ve Maryonika ve Kalyopi ve Penelopi ve Espasya ve Eleniko’ya mesele-i mirâsımız vechile mevrûs olup ol vechile altmış sehm hisse-i şâyi‘a-i âlât-ı gedik-i mezkûr ber-minvâl-i muharrer yedimizde mülkümüz olduğunu nâtıklar sene-i sâbıka yani bin iki yüz yetmiş yedi senesi Saferü’l-hayrı’nın yirmi beşinci günü târihiyle müverrahlar cânib-i zecriyeden on üç kıt‘a sûret yedimize i‘tâ olunmağla el-hâletü hâzihi biz bi’l-asâle ve vekîl-i hâzır-ı merkūm Andon müvekkileleri merkūmat Diyalefti ve Fotni ve Kadınko ve Maryonika ve Kalyopi ve Penelopi ve Aspasya ve Eleniko’ya izâfetle bi’l-vekâle ve hâzır-ı merkūm Odisef dahi bi’l-asâle ve âlât-ı gedik-i mezkûrdan ber-minvâl-i muharrer irsen mâlik olduğumuz altmış sehm hisse-i şâyi‘a-i mezkûreyi be-safka-i vâhide yirmi bin guruşa ve hâzır-ı merkūm Odisef kezâlik âlât-ı gedik-i mezkûrdan ber-vech-i meşrûh mâlik olduğu âhar altmış sehm hisse-i şâyi‘a-i merkūmeyi dahi be-safka-i vâhide yirmi bin guruşa tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile müvekkile-i merkūme Takohi’ye bey‘ ve temlîk ve vech-i lâyıkı üzere teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semenleri olan cem‘an kırk bin guruşu tamâmen bize def‘ u teslîm biz dahi yedinden tamâmen ve kâmilen bi’l-asâle ve bi’l-vekâle ahz u kabz edip mebî‘-i mezkûrların tağrîr ve gabnlarına müte‘allika [4a] da‘vâdan müvekkile-i merkūme Takohi’nin zimmetini ibrâ-yı sahîh-i şer‘î ile biz bi’l-asâle ve vekîl-i merkūm Andon dahi müvekkileleri merkūmâta izâfetle bi’l-vekâle ve hâzır-ı merkūm Odisef dahi bi’l-asâle ibrâ vü ıskāt eylediğimizde müvekkile-i merkūme Takohi dahi kezâlik mebî‘-i mezkûrların tağrîr ve gabnlarına müte‘allika da‘vâdan bizimle müvekkilât-ı merkūmât ve hâzır-ı merkūm Odiyif’in zimmetimizi ibrâ-yı sahîh-i şer‘î ile ibrâ vü ıskāt ve tarafeynden her birimiz ber-minvâl-i muharrer âharın ibrâsını asâleten ve vekâleten kabûl eyledik, ba‘de’l-yevm mecmû‘ âlât-ı gedik-i mezkûrde bizimle müvekkilât-ı merkūmât Diyalefti ve Fotni ve Kadınko ve Maryonika ve Kalyopi ve Penelopi ve Espasya ve Elenikove hâzır-ı merkū[m] Odisef’in aslâ ve kat‘â alâka ve medhalimiz kalmayıp müvekkile-i merkūme Takohi’nin mülk-i müşterâsı ve hakk-ı sırfı olmuşdur dediklerinde gıbbe’t-tesâdukı’ş-şer‘î mâ-vaka‘a bi’t-taleb ketb olundu. Fî 23 Zilka‘de sene 1278 Şuhûdü’l-hâl: Muhzır Feyzullah Ağa b. ( ), Muhzır el-Hâc Salih Ağa b. Muhzır Mustafa Ağa b. Muhzır Ahmed Ağa b( ), ve gayruhum