İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 60 Hüküm no: 12 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Seferoğlu Anaştaş v. Kiryako’nun sahip olduğu şerbethâne hisselerini manifaturacı Niğdeli Bayramoğlu Avram v. Kilimandos’a satması Şerbethâne gediği 40000 guruş Kezâlik teba‘a-i Devlet-i aliyye’nin Rum milletinden ve şerbethâneci esnâfından Hacı Seferoğlu Anaştaş v. Kiryako meclis-i şer‘-i şerîf-i hatîrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan bâ‘isü’r-rakīm mâ[n]ifaturacı Niğdeli Bayramoğlu Avram v. Kilimandos muvâcehesinde teba‘a-i Devlet-i aliyye’den esnâf-ı merkūme ustabaşılarından Dülbendcioğlu Andon v. Ohannes ve Abraham v. Kiryako ve Vasil v. Nikola hâzır oldukları hâlde ikrâr-ı tam ve takrîr-i kelâm edip mahmiye-i İstanbul’da Tavuk Pazarı nâm mahalde kâin bir tarafdan Esir Pazarı Hanı ve bir tarafdan Baklalı Hân ve ba‘zen Hacı Sarafim bakkal dükkânı ve bir tarafdan berber dükkânı ve taraf-ı râbi‘i tarîk-i âm ile mahdûd Ayasofya-i Kebîr Câmi’-i şerîfi evkāfı müsakkafâtından Praşkova v. Sava ile sâir ma‘lûmü’l-esâmî kimesnelerin bi’l-icâreteyn taht-ı tasarruflarında olan şehriye doksan guruş kirâlı Serrâc Hanı koltuğu demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla doksan dokuz buçuk sehm hisse-i şâyi‘ası âharların yedlerinde mülkleri olup mâ‘adâ yirmi buçuk sehm hisse-i şâyi‘ası dahi akd-i âti’z-zikrin sudûruna değin yedimde olan sene-i sâbıka yani bin iki yüz yetmiş yedi senesi Şevvalü’l-mükerreminin on üçüncü günü târihiyle müverrah ve ol târihde rüsûm-i zecriye nâzırı olan sa‘âdetlü Nazif Beyefendi’nin mührüyle memhûr işbu bir kıt‘a sûret ve hâlâ rüsûm-i zecriye nâzırı izzetlü Hüseyin Ağa’nın bir kıt‘a ilmühaberi mantûklarınca yedimde mülk ve hakkım olmağla ben âlât-ı gedik-i mezkûrdan ber-minvâl-i muharrer mâlik olduğum yirmi buçuk sehm hisse-i şâyi‘a-i merkūmeyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ kırk bin guruşa merkūm Avram’a bey‘ ve temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm kırk bin guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm yirmi buçuk sehm hisse-i şâyi‘a-i âlât-ı gedik-i mezkûrde benim aslâ ve kat‘â alâka ve medhalim kalmayıp merkūm Avram’ın mülk-i müşterâsı ve hakk-ı sırfı olmuşdur dedikde gıbbe. Fî 21 Zilka‘de sene 1278 Şuhûdü’l-hâl: Muhzır Feyzullah Ağa b. ( ), Muhzır el-Hâc Salih Ağa b. ( ), Muhzır Mustafa Ağa, Muhzır Şakir Ağa b. ( ), ve gayruhum