İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 61 Hüküm no: 13 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Magdeleni bt. Petro’nun annesinden kendisine miras kalan şerbethâne hisselerini Avram v. Anaştaş’a satması Şerbethâne gediği 15000 guruşa Kezâlik vilâyet-i Anadolu’da Bereketlü nâm-ı diğer Çamardı kazâsına tâbi‘ Fertek karyesinde sâkine iken bundan mukaddem fevt olan teba‘a-i Devlet-i aliyye’nin Rum milleti nisvânından Despino bt. Londos v. Adam’ın sadriye-i kebîre kızı teba‘a-i Devlet-i aliyye’nin Rum milleti nisvânından olup hasren vârisesi olduğu bi’l-ihbâr lede’ş-şer‘i’l-enver zâhir ve mütehakkık olan karye-i mezkûrede sâkine Magdeleni bt. Petro v. Bünyad tarafından husûs-ı âti’l-beyânda ikrâra bâ-hüccet-i şer‘iyye kabûlüne mevkūfe vekil olduğu merkūme Magdeleni’nin şahsını bilirler her biri teba‘a-i Devlet-i aliyye’nin Rum milletinden ve karye-i mezkûre ahâlisinden olup mahmiye-i İstanbul’da Mercan Çarşısı nâm mahalde vâki‘ Ali Paşa hânında kâin şerbethâne ustası Damyanos v. Polinhoron ve mahmiye-i mezkûrede Eminönü nâm mahalde mağazacı olan Anaştaş v. Yasef şehâdetleriyle ber-nehc -i şer‘î sâbit olanteba‘a-i Devlet-i aliyye’nin Rum milletinden ve şerbethâneci esnâfı ustabaşılarından Kurtoğlu Bünyad v. Pretomos meclis-i şer‘-i şerîf-i hatîrde karye-i merkūmede sâkine esnâf-ı mezkûreden ve teba‘a-i Devlet-i aliyye’nin Rum milletinden olduğu bâ-ilmühaber mütehakkık olan bâ‘isü’r-rakīm Avram v. Anaştaş tarafından husûs-ı âti’l-beyânda tasdîka vekîl-i şer‘îsi teba‘a-i Devlet-i aliyye’nin Rum milletinden ve esnâf-ı mezkûreden Abraham v. Kiryako muvâcehesinde teba‘a-i Devlet-i aliyye’nin Rum milletinden ve esnâf-ı merkūme ustabaşılarından Kumkapılı Anaştaş v. Nikola hâzır olduğu hâlde bi’l-vekâle ikrâr ve takrîr-i kelâm edip müvekkilem merkūme Magdeleni merhûme Çinili cedîd Valide Sultan tâbe serâhâ Evkāfı celîlesi müsakkafâtından mahmiye-i mezkûrede vâki‘ Valide Hanı demekle arîf hân-ı kebîr derûnunda fevkānî bâb-ı vasatda kâin beher şehr altı guruş icâre-i müecceleli benimle Yorgi ve Sarafim ve Makrane ve Anaştaş’ın bi’l-icâreteyn taht-ı tasarruflarımızda olan şehriye yirmi guruş kirâlı pîşgâhında vâki‘ bir matbah ve ittisâlinde kâin camlı peykeyi hâvî beşinci bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla yüz sehm hisse-i şâyi‘ası âharların ve on yedi buçuk sehm hisse-i şâyi‘ası yedimde olup işbu sene-i mübâreke Şevvali’l-mükerreminin dokuzuncu günü târihiyle müverrah hâlâ rüsûm-i zecriye nâzırı izzetlü Hüseyin Ağa’nın mührüyle memhûr bir kıt‘a i‘lâmı mantûkunca yedimde mülküm ve mâ‘adâ iki buçuk sehm hisse-i şâyi‘ası dahi anam merkūme Despino’nun hayâtında yedimde olan şehr-i mezkûrun yirmi yedinci günü târihiyle müverrah nâzır-ı mûmâ-ileyhin mührüyle memhûr diğer bir kıt‘a i‘lâmı mantûkunca ile’l-fevt yedinde mülkü ve ba‘de fevtihâ iki buçuk sehm hisse-i şâyi‘a-i âlât-ı gedik-i mezkûr ancak bana mevrûs olmağla ben âlât-ı gedik-i mezkûrdan ber-minvâl-i muharrer mâlike olduğum cem‘an yirmi sehm hisse-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ müvekkil-i merkūm Avram’a on beş bin guruşa bey‘ ve temlîk vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı mezkûr on beş bin guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrun cem‘an yirmi sehm hisse-i şâyi‘a-i merkūmesinde benim aslâ ve kat‘â alâka ve medhalim kalmayıp müvekkil-i merkūm Avram’ın mülk-i müşterâsı ve hakk-ı sırfı olmuşdur dedikde gıbbe. Fî Selh-i Şevval sene 1278 Şuhûdü’l-hâl: Muhzır Feyzullah Ağa b. ( ), Muhzır el-Hâc Salih Ağa b. ( ), Muhzır Mehmed Ağa b. ( ), Muhzır Mustafa Ağa b. ( ), ve gayruhum