İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 62 Hüküm no: 14 Orijinal metin no: [4a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccardan Paskal v. Kiryanos’un şerbethâne hisselerini Pamukçu Yorgi v. İstavri’ye satması Şerbethâne 6000 guruş Kezâlik mahrûse-i Galata’da vâki‘ Havyar hânında sâkin tüccârdan ve teba‘a-i Devlet-i aliyye’nin Eflaklı tâifesinden Paskal v. Kiryanos meclis-i şer‘-i hatîrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan bâ‘isü’r-rakīm Pamukcu Yorgi v. İstavri muvâcehesinde <>her biri teba‘a-i Devlet-i aliyye’nin Rum milletinden şerbethâneci esnâfının Arnavudköyü ustabaşısı Mihalaki v. Dimitri ve mahrûse-i Galata ustabaşısı İgnad v. Yorgi hâzır oldukları hâlde ikrâr-ı tâm ve takrîr-i kelâm edip mahrûse-i merkūmeye muzâfe Arnavud karyesinde Çoban kapısı civârında çarşı içinde bakkal dükkânı ittisâlinde vâki‘ bir tarafdan Sofrun bakkal dükkânı ve bir tarafdan berber Hıristo berber dükkânı ve bir tarafdan Hacı Panayot şerbethânesi ve taraf-ı rabi‘itarîk-i âm ile mahdûd karye-i mezkûrede vâki‘ Aya İsterati Kilisesi avârızı vakfı müsakkafâtından Andriko’nun taht-ı tasarrufunda olan şehriye otuz guruş kirâlı Kürkçübaşıoğlu Yanko şerbethânesi demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla altmış sehm hisse-i şâyi‘ası Aspasya bt. Sava’nın bâ-sûret yedinde mülkü olup mâ‘adâ altmış sehm hisse-i şâyi‘ası dahi yedimde olup bin iki yüz yetmiş üç senesi Zilhicceti’ş-şerîfesi selhi târihiyle müverrah ve ol târihde rüsûm-i zecriye muhassılı olan sa‘âdetlü Rüstem Paşa’nın mührüyle memhûr işbu bir kıt‘a sûret ve hâlâ rüsûm-i zecriye nâzırı izzetlü Hüseyin Ağa’nın işbu bir kıt‘a ilmühaberi mantûkunca akd-i âti’z-zikrin sudûruna değin yedimde mülk ve hakkım olmağla ben âlât-ı gedik-i mezkûrdan ber-minvâl-i muharrer mâlik olduğum altmış sehm hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şerîke-i merkūme altı bin guruşa merkūm Yorgi’ye bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer [4b] iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm altı bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm altmış sehm hisse-i şâyi‘a-i mezkûrede benim aslâ ve kat‘â alâka ve medhalim kalmayıp merkūm Yorgi’nin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 29 Zilka‘de sene 1278 Şuhûdü’l-hâl: Muhzır Feyzullah Ağa b. ( ), Muhzır el-Hâc Salih Ağa b. ( ), Muhzır Ahmed Ağa b. ( ), Muhzır Süleyman Ağa b. ( ), ve gayruhum