İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 63 Hüküm no: 15 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aspasya bt. Sava’nın şerbethâne hisselerini Pamukçu Dimitri v. İstavri’ye satması Şerbethâne gediği mübâya‘ası 6000 guruşa Kezâlik mahrûse-i Galata’ya muzâfe Arnavud karyesinde sâkine şahsı ta‘rîf-i şer‘î ile mu‘arrefe olan Aspasya bt. Sava meclis-i şer‘-i hatîrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan bâ‘isü’r-rakīm Pamukçu Dimitri v. İstavri muvâcehesinde her biri teba‘a-i Devlet-i aliyye’nin Rum milletinden ve şerbethâneci esnâfının mârrü’l-beyân Arnavudköyü kolu ustabaşısı Mihalaki v. Dimitri ve Niğdeli mânifaturacı Yani v. Simon hâzır oldukları hâlde ikrâr-ı tâm ve takrîr-i kelâm edip sâlifü’l-beyân Arnavud karyesinde Çoban kapısı civârında çarşı içinde bakkal dükkânı ittisâlinde vâki‘ bir tarafdan Sofrun bakkal dükkânı ve bir tarafdan berber Hıristo berber dükkânı ve bir tarafdan Hacı Panayot şerbethânesi ve taraf-ı rabi‘i tarîk-i âm ile mahdûd karye-i mezkûrede vâki‘ Aya İstrati Kilisesi avârızı vakfı müsakkafâtından Andriko’nun taht-ı tasarrufunda olan şehriye otuz guruş kirâlı Kürkçübaşıoğlu Yanko şerbethânesi demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla altmış sehm hisse-i şâyi‘ası Pamukcu Yorgi v. İstavri’nin yedinde mülkü olup mâ‘adâ altmış sehm hisse-i şâyi‘ası dahi yedimde olup işbu sene-i mübâreke Muharremü’l-harâmının yirmi birinci günü ve yirmi ikinci günleri târihleriyle müverrah ve ol târihde rüsûm-i zecriye nâzırı olan sa‘âdetlü Nazif Beyefendi’nin mührüyle memhûr işbu bir kıt‘a sûret ve hâlâ rüsûm-i zecriye nâzırı izzetlü Hüseyin Ağa’nın işbu bir kıt‘a ilmühaber mantûklarınca akd-i âti’z-zikrin sudûruna değin yedimde mülk ve hakkım olmağla ben âlât-ıgedik-i mezkûrdan ber-minvâl-i muharrer mâlike olduğum altmış sehm hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şerîk-i merkūm altı bin guruşa merkūm Dimitri’ye bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm altı bin guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm altmış sehm hisse-i şâyi‘a-i âlât-ı gedik-i mezkûrde benim aslâ ve kat‘â alâka ve medhalim kalmayıp merkūm Dimitri’nin mülk-i müşterâsı ve hakk-ı sırfı olmuşdur dedikde gıbbe. Fî 7 Zilhicce sene 1278 Şuhûdü’l-hâl: Muhzır Feyzullah Ağa b. ( ), Muhzır el-Hâc Salih Ağa b. ( ), Muhzır Şakir Ağa b. ( ), Muhzır Süleyman Ağa b. ( ), ve gayruhum