Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 521 Hüküm no: 626 Orijinal metin no: [108b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Fazlı b. Ömer’in menzilini vârislerinin Hacı Musa b. Durmuş’a satması Mahmiye-i İstanbul’da Bıçakçı mahallesi sükkânından iken bundan akdem vefât eden el-Hâc Fazlı b. Ömer nâm müteveffânın verâseti sulbî kebîr oğulları Mehmed ve Hasan nâm kimesneler ile sulbiye kebîre kızı Havva’ya münhasıra olduğu şer‘an zâhir ve müte‘ayyin oldukdan sonra mezbûrân Mehmed ve Hasan asâleten ve mezbûre Havva tarafından husûs-ı âti’l-beyâna vekîl olup yedinde olan hüccet-i şer‘iyye nâtık olduğu üzre vekâletine hükm-i şer‘î lâhık olan yine mezbûrenin ammisi oğlu Ömer Çelebi b. Mehmed nâm kimesne vekâleten meclis-i şer‘-i şerîf-i enverde işbu bâ‘isü’l-kitâb el-Hâc Musa b. Durmuş nâm kimesne mahzarında her biri ikrâr ve takrîr-i kelâm edip mûrisimiz müteveffâ-yı mezbûrun metrûkâtından olup mahalle-i mezbûrede vâki‘ bir tarafdan Hüsam Bey vakfı olan arsaya ve bir tarafdan bıçakçı el-Hâc Rıdvan b. Abdullah ta‘rîfiyle olan vakıf menzil ve iki tarafdan tarîk-i âm ile mahdûd hâriciyyesi tabaka-i ulyâsında iki bâb fevkānî oda ve sofa vustâda bir bâb oda ve altında bir ahır ve dâhiliyyesinde bir bâb fevkānî oda ve bir bâb tahtânî oda ve bir kiler ve bir tahtânî matbah ve dehliz ve sofa ve bir su kuyusunu ve bir taş musluk ve bir taş şadırvan ve zât-ı eşcâr-ı müsmire ve gayr-ı müsmireyi müştemil mülk-i mevrûsumuz olan menzilimizi cemî‘ tevâbi‘ ve levâhıkıyla mezbûr el-Hâc Musa’ya tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bi safkatin vâhidetin yedi yüz on kıt‘a esedî guruşa bey‘ ve teslîm ol dahi minvâl-i muharrer üzre iştirâ ve kabûl ettikden sonra semeni olan meblağ-ı mezbûr yedi yüz on kıt‘a esedî guruşu müşterî-i mezbûrdan bi’t-tamâm ve’l-kemâl asâleten [ve] vekâleten alâ kadri hısasihim ahz u kabz eyledik ba‘de’l-yevm menzil-i mahdûd-ı merkūm el-Hâc Musa’nın mülk-i müşterâsı olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: El-imâm Ahmed Efendi b. Mustafa, el-Hâc Ahmed b. Abdullah, el-Hâc Abdullah b. el-Hâc Ali, el-Hâc Hüseyin b. Osman, Mehmed Çelebi b. Ali, Mehmed Efendi İmâm-ı mahalle-i Bıçakçı.