İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 64 Hüküm no: 16 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hac dönüşü Cidde’de vefât eden Seyyid Hacı Ali Ağa b. Seyyid Hasan’dan kendilerine miras kalan tütüncü mağazası hisseleri için mirasçılarının hüccet talebi Tütüncü mağazası ihbârı Âsitâne-i sa‘âdet-âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gedikleriyle sâir gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmakve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen mahmiye-i İstanbul’da Tahtakale civârında Yavaşça Şahin mahallesi ahâlisinden olup bundan mukaddem edâ-i farîza-i hacc-ı şerîf için cânib-i Hicaz-ı mağfiret-tırâza azîmet ve ba‘de edâi’l-hac bender-i Cidde’de vefât eden es-Seyyid el-Hâc Ali Ağa b. es-Seyyid Hasan’ın verâseti mahalle-i mezkûrede sâkineler zevce-i menkûha-i metrûkesi Hafize Hatun bt. Mehmed Kapdan ile mezbûreden mütevellide sulbiye-i kebîre kızı Şerife Fâtımatü’z-zehra Hanım’a ba‘de’l-inhisâr bâ‘isetü’l-kitâb nefsinden asîl ve mezbûre Şerife Fâtımatü’z-zehra Hanım tarafından husûs-ı âti’l-beyânda tasdîka vekîl-i şer‘îsi zâtı ta‘rîf-i şer‘î mu‘arrefe olan mezbûre Hafize Hanım meclis-i şer‘-i şerîf-i hatîrde tütüncü esnâfının kethüdâ vekîli Ahmed Efendi b. Osman ve yiğitbaşısı Ahmed Ağa b. el-Hâc Ali ve yazıcısı Ahmed Efendi b. el-Hâc Mehmed hâzır oldukları hâlde bi’l-asâle ve bi’l-vekâle takrîr-i kelâm ve ta‘bîr ani’l-merâm edip zikr olunan Tahtakale civârında Rüstem Paşa Câmi’-i şerîfinin meyyit kapısıyla mukaddemâ kolluk ve hâlâ Geredeli el-Hâc Halil Ağa mağazası beynlerinde kâin Eshâm Muhâsebesi Kalemi’nde zevcim müteveffâ-yı mezbûr es-Seyyid el-Hâc Ali Ağa ismine mukayyed merhûm-ı müşârün-ileyh Rüstem Paşa Vakfı musakkafâtından bi’l-icâreteyn taht-ı tasarrufumda olan şehriye beş guruş kirâlı bir bâb kebîr kârgîr tütüncü mağazası derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme bin iki yüz kırk altı senesi şehr-i Rebî‘ülevveli’nin on birinci günü târihiyle müverrah işbu bir kıt‘a sûret ve esnâf-ı merkūme kethüdâsı el-Hâc Mehmed Latif Efendi’nin takdîm eylediği bir kıt‘a ilmühaber mantûklarınca zevcim müteveffâ-yı mezbûr es-Seyyid el-Hâc Ali Ağa’nın hayâtında ile’l-vefât yedinde mülkü ba‘de vefâtihî benimle kızı müvekkilem mezbûre Şerife Fâtımatü’z-zehra Hanım’a mevrûs olup ol vechile âlât-ı gedik-i mezkûr el-yevm mağaza-i mezkûre derûnunda mevcûde ve müstakır olarak ber-vech-i meşrûh benimle müvekkilem merkūme Şerife Fâtımatü’z-zehra Hanım’ın irsen mülkümüz olduğunu nâtık yedimizde sened-i şer‘î olmamağla hakīkat-i hâl vukūf-ı tâmları olan kimesnelerden istihbâr ve suâl olunup haberleri tahrîr ve imlâ ile âlât-ı gedik-i mezkûr ber-minvâl-i muharrer benimle müvekkilem merkūmenin el-yevm mülkümüz olduğunu nâtıka kıbel-i şer‘den bir kıt‘a hüccet-i şer‘iyye tarhrîr ve yedimize i‘tâ buyurulmak muradımızdır deyu bi’l-asâle ve bi’l-vekâle istid‘â ettikde hâl asîl ve vekîl-i merkūme Hafize Hatun’un bâlâda bast u beyân eylediği minvâl üzere olduğunu esnâf-ı hâzirûn-ı merkūmûn alâ tarîki’ş-şehâde ihbâr etmeleriyle vâki‘-i hâl hıfzan li’l-makāl işbu vesîka-i enîka ketb ü imlâ olundu. Fî 21 Zilhicce sene 1278 Şuhûdü’l-hâl: Muhzır Feyzullah Ağa b. ( ), Muhzır el-Hâc Salih Ağa b. ( ), Muhzır Süleyman Ağa b. ( ), Muhzır Şakir Ağa b. ( ), ve gayruhum