İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 66 Hüküm no: 17 Orijinal metin no: [4b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü esnâfından Dimitri v. Yorgi’nin tütüncü dükkanındaki hisselerinin bir kısmını Dimitri v. Karanikolaoğlu Kosta’ya satması Tütüncü mübâya‘ası Kezâlik teba‘a-i Devlet-i aliyye’nin Rum milletinden ve tütüncü esnâfından Dimitri v. Yorgi meclis-i şer‘-i şerîf-i hatîrde esnâf-ı merkūmeden ve teba‘a-i Devlet-i aliyye’nin Rum milletinden olduğu bâ-ilmühaber mütehakkık olan bâ‘isü’r-rakīm diğer Dimitri v. Karanikolaoğlu Kosta muvâcehesinde esnâf-ı merkūmenin kethüdâsı el-Hâc Mehmed Latif Efendi b. İsmail ile duhân tüccârından mazbûtü’l-esâmî on nefer müslim ve beş nefer hıristiyan taraflarından mürsel esnâf-ı merkūmenin yiğitbaşısı Receb Ağa b. Ahmed hâzır olduğu hâlde ikrâr-ı tâm ve takrîr-i kelâm edip mahmiye-i İstanbul hısnı ebvâbından Cibali kapısı hâricinde Seferikoz mahallesinde İspenciyar dükkânı karşısında vâki‘ cidâr-ı hısna muttasıl bir tarafdan Keresteci Süleyman Efendi’nin tönbekici dükkânı ve bir tarafdan cidâr-ı hısn ve bir tarafdan Mahmud Efendi’nin kunduracı dükkânı ve taraf-ı rabi‘i tarîk-i âm ile mahdûd Ayasofya-i Kebîr Câmi’-i şerîfi evkāf-ı celîlesi müsakkafâtından a‘ma Hasan Efendi’nin bi’l-icâreteyn taht-ı tasarrufunda olan şehriye üç buçuk guruş kirâ-yı kadîmelü Eshâm Muhâsebesi kaleminde Ahmed ismine mukayyed bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yedimde olup bin iki yüz altmış iki senesi Zilka‘deti’ş-şerîfesinin on üçüncü günü tarihiyle müverraha ve ol târihde Dârü’l-hilâfeti’l-aliyye kādısı olan Kahvecibaşızade Mehmed Nurullah Efendi merhûmun imzâ ve hatemini hâviye işbu bir kıt‘a hüccet-i şer‘iyye ve kethüdâ-yı mezbûrun takdîm eylediği işbu bir kıt‘a ilmühaber mantûklarınca akd-i âti’z-zikrin sudûruna değin yedimde müstakillen mülk ve hakkım olmağla ben ber-minvâl-i muharrer mâlik olduğum âlât-ı gedik-i mezkûru yüz yirmi sehm i‘tibâr edip elli sehm hisse-i şâyi‘asını yedimde bi’l-ibkā mâ‘adâ yetmiş sehm hisse-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile on üç bin beş yüz guruşa merkūm diğer Dimitri’ye bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı mezkûr on üç bin beş yüz guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz edip fîmâ-ba’d âlât-ı gedik-i [5a] mezkûrun yetmiş sehm hisse-i şâyi‘a-i merkūmesinde benim aslâ ve kat‘â alâka ve medhalim kalmayıp merkūm diğer Dimitri’nin mülk-i müşterâsı ve hakk-ı sırfı olmağla mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 27 Zilhicce sene 1278 Şuhûdü’l-hâl: Muhzır Feyzullah Ağa b. ( ), Muhzır el-Hâc Salih Ağa b. ( ), Muhzır Şakir Ağa b. ( ), Muhzır Ahmed Ağa b. ( ), ve gayruhum