İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 68 Hüküm no: 19 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Astârcı esnâfından Mustafa Efendi b. el-Hâc Halil Efendi’nin sahip olduğu çeşitli eşyaları 3.000 kuruş karşılığında eşi Hadice Hanım bt. İbrahim’e satması ve alacağından vazgeçmesi Husûsla eşyâ mübâya‘ası Husûs-ı âti’l-beyânın mahallinde ketb ü tahrîri için cânib-i şerî‘at-ı garrâdan bi’l-iltimâs me’zûnen irsâl olunan Kâtib es-Seyyid Hafız Osman Nuri Efendi mahmiye-i İstanbul’da Sarachane kurbünde Haydarhâne mahallesinde vâki‘ astârcı esnâfından Mustafa Efendi b. el-Hâc Halil Efendi’nin müste’ciren sâkin olduğu menzile varıp zeyl-i kitâbda muharrerü’l-esâmî müslimîn huzûrlarında akd-i meclis-i şer‘-i nebevî etdikde mezbûr Mustafa Efendi meclis-i ma‘kūd-ı mezkûrde hâlâ zevcesi işbu bâ‘isetü’l-kitâb mu‘arrefetü’z-zât Hadice Hanım bt. İbrahim mahzarında ikrâr-ı tâm ve takrîr-i kelâm edip bey‘-i âti’z-zikrin sudûruna değin yedimde mâlım olup işbu meclis-i şer‘de mu‘âyene olunan mecmû‘u müsta‘mel yün memlû altı aded minder ve kıtık memlû on sekiz aded basma duvar yastığı ve kıtık memlû on iki aded çatma duvar yastığı ve yün memlû dört aded Moskov bezi döşek ve penbe memlû dört aded basma şilte ve yün memlû on aded basma baş yastığı ve penbe memlû on aded basma yüz yastığı ve bir Edirne keçesi ve çukaya kaplı elma dibi bir müsta‘mel boy kürkü ve sagīr ve kebîr sekiz aded nuhâs tencere ma‘a kapak ve beş aded nuhâs sahan ma‘a kapak ve iki nuhâs güğüm ve bir aded nuhâs kazgân ve bir aded nuhâs cameşûy leğeni ve bir aded kehribâ çubuk imâmesi ve bir aded çalar sâ‘atimi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile zevcem mezbûre Hadice Hanım’a üç bin guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl etdikden sonra semeni olan meblağ-ı mezkûr üç bin guruşun mutâlebesine müte‘allika da‘vâdan zevcem mezbûre Hadice Hanım’ın zimmetini ibrâ-yı sahîh-i şer‘î ile kabûlünü hâvî ibrâ vü ıskāt eyledim ba‘de’l-yevm eşyâ ve evânî-i nühâsiyye-i muharrere-i merkūmede benim aslâ ve kat‘â alâka ve medhalim kalmayıp zevcem mezbûre Hadice Hanım’ın mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î vâki‘ hâli kâtib-i mûmâ-ileyh mahallinde ilh. Fî 10 Zilka‘de sene 1278 Şuhûdü’l-hâl: Şâhidûne’s-sâbikūn