İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 69 Hüküm no: 20 Orijinal metin no: [5a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Astârcı esnâfından Mustafa Efendi’nin astârcı esnâfının kethüdâsı Seyyid el-Hâc Ahmed Efendi’den alacağını tahsil ettiği İstîfâ-yı deyn Husûs-ı âti’l-beyânın mahallinde ketb ü tahrîri için cânib-i şerî‘at-ı garrâdan bi’l-iltimâs me’zûnen irsâl olunan kâtib es-Seyyid Hafız Osman Nuri Efendi mahmiye-i İstanbul’da Sarachâne kurbünde Haydar mahallesinde vâki‘ astârcı esnâfından Mustafa Efendi b. el-Hâc Halil Efendi’nin müste’ciren sâkin olduğu menzile varıp zeyl-i kitâbda muharrerü’l-esâmî müslimîn huzûrlarında akd-i meclis-i şer‘-i nebevî etdikde mezbûr Mustafa Efendi meclis-i ma‘kūd-ı mezkûrde esnâf-ı merkūme kethüdâsı işbu bâ‘isü’l-kitâb es-Seyyid el-Hâc Ahmed Efendi b. es-Seyyid Hüseyin mahzarında ikrâr-ı tâm ve takrîr-i kelâm edip mezbûr es-Seyyid el-Hâc Ahmed Efendi zimmetinde mâlımdan ve yedimden iştirâ ve kabz eylediği top ve fiyâtı beynimizde ma‘lûm mânifatura emti‘ası ta‘bîr olunur bâ-defter-i müfredât basma ve astar ve sâire esmânından ba‘de’l-muhâsebe alacak hakkım olan on sekiz bin üç guruşu mezbûr es-Seyyid el-Hâc Ahmed Efendi bundan mukaddem mahzar-ı şuhûdda bana def‘ u teslîm eylediğinde ben dahi yedinden tamâmen ve kâmilen ahz u kabz edip mezbûr es-Seyyid el-Hâc Ahmed Efendi’nin yed ve zimmetinde bir akçe ve bir habbe hakkım ve alacağım kalmamışdır deyu mukırr-ı mezbûr Mustafa Efendi’nin sâdır olan takrîr-i meşrûhunu mezbûr es-Seyyid el-Hâc Ahmed Efendi tasdîk ve tahkîk eylediğini kâtib-i mûmâ-ileyh mahallinde ilh. Fi 10 Zilka‘de sene 1278 Şuhûdü’l-hâl: Şâhidûne’s-sâbikūn