İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 69 Hüküm no: 21 Orijinal metin no: [5a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü esnâfından İbrahim Edhem Ağa’nın sahip olduğu arsayı Umûr-ı Hâricîye Nezâreti hademesinden Mehmed Şakir Ağa’ya satması Mülk arsa mübâya‘ası Mahmiye-i İstanbul’da Küçükpazar kurbünde Hızır Bey mahallesinde sâkin tütüncü esnâfından İbrahim Edhem Ağa b. Ahmed meclis-i şer‘-i şerîf-i enverde Umûr-ı Hâricîye Nezâret-i celîlesi hademesinden bâ‘isü’l-kitâb Mehmed Şakir Ağa b. Abdullah mahzarında ikrâr-ı tâm ve takrîr-i kelâm edip zikr olunan Hızır Bey mahallesinde kâin el-yevm bir tarafdan Halil Ağa b. İsmail menzili ve ba‘zen Emetullah Hatun bt. Ahmed menzili ve bir tarafdan yine mezbûre Emetullah Hatun menzili ve tarafeyni tarîk-i âm ile mahdûd altmış bir numaralı terbî‘ân yüz elli dört zirâ‘ on dört parmak bir bâb mülk mühterik menzil arsası akd-i âti’z-zikrin sudûruna değin yedimde olup bin iki yüz yetmiş üç senesi Şa‘banü’l-mu‘azzamının üçüncü günü târihiyle müverraha ve ol târihde mahmiye-i mezkûrede vâki‘ Ahi Çelebi mahkemesinde nâibü’ş-şer‘ olan mevâlî-i izâmdan fazîletlü es-Seyyid İbrahim Halil Efendi’nin imzâ ve hatemini hâviye işbu bir kıt‘a hüccet ve işbu sene-i mübâreke şehr-i Rebî‘ülevveli’nin yirminci günü târihiyle müverrah Ebniye Meclisi tarafından verilen işbu bir kıt‘a ilmühaber mantûklarınca yedimde mülk ve hakkım olmağla ben ber-minvâl-i muharrer mâlik olduğum arsa-i mahdûde-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile dokuz bin guruşa mezbûr Mehmed Şakir Ağa’ya bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm dokuz bin guruşu tamamen bana def‘ u teslîm eylediğinde ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm arsa-i mahdûde-i mezkûrede benim aslâ ve kat‘â alâka ve medhalim kalmayıp mezbûr Mehmed Şakir Ağa’nın mülk-i müşterâsı ve hakk-ı sırfı olmuşdur dedikde gıbbe. Fî 16 Zilka‘de sene 1278 Şuhûdü’l-hâl: Mahalle-i mezkûre muhtârı nalbur el-Hâc Mehmed Ağa b. el-Hâc Osman, Ve ahâlisinden tütüncü esnâfından Abdülaziz Ağa b. Abdi, Muhzır Feyzullah Ağa b. ( ), Muhzır el-Hâc Salih Ağa b. ( ), ve gayruhum