İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 70 Hüküm no: 22 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dülger kalfası Tırpanoğlu Yorgi v. Mihal’in ölümünden sonra mirasçılarına kalan şerbethâne hisselerinin satışı Şerbethâne, Tarabya’da Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen medîne-i Üsküdar’a tâbi‘ Çengel karyesinde sâkin iken bundan mukaddem fevt olan teba‘a-i Devlet-i aliyye’nin Rum milletinden dülger kalfası Tırpanoğlu Yorgi v. Mihal’in verâseti her biri teba‘a-i Devlet-i aliyye’den zevce-i metrûkesi Hrisi bt. Dimitri ve anası Bobosa bt. Yani ve sulbî kebîr oğulları Panayot ve Nikola ve Aleko ve sulbiye-i kebîre kızları Luksandra ve Fotni ve Obeniçe’ye münhasıra ve tashîh-i mesele-i mîrâsları iki yüz on altı sehimden olup sihâm-ı mezkûreden yirmi yedi sehmi zevce-i merkūme Hrisi’ye ve otuz altı sehmi ümm-i merkūme Bobosa’ya ve otuz dörder sehimden yüz iki sehmi ebnâ-i merkūmûn Panayot ve Nikola ve Aleko’ya ve on yedişer sehimden elli bir sehmi dahi benât-ı merkūmât Luksandıra ve Fotni ve Obeniçe’ye isâbeti lede’ş-şer‘i’l-enver zâhir ve mütehakkık oldukdan sonra merkūm Nikola meclis-i şer‘-i şerîf-i hatîrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan bâ‘isü’r-rakīm Şerbethâneci Kara Yanioğlu Yorgi v. Yani muvâcehesinde her biri teba‘a-i Devlet-i aliyye’nin Rum milletinden ve şerbethâneci esnâfının Beyoğlu kolu ustabaşısı Dülbendcioğlu Hacı Andon v. Ohannes ve Çarşı kolu ustabaşısı Abraham v. Kiryako ve Tarabya kolu ustabaşısı Vasil v. Nikola ve esnâfından Tarabyalı Argiri v. Yorgi ve karye-i mezkûre muhbiri Vasil v. Mihal ve merkūme Luksandıra’nın zevci Nikola v. İstanço hâzır oldukları hâlde ikrâr-ı tâm ve takrîr-i kelâm edip mahrûse-i Galata’ya muzâfe Tarabya karyesinde vâki‘ bir tarafdan mukaddemen Tanaş menzili ve hâlâ Kadınko’nun bakkal dükkânı ve bir tarafdan leb-i deryâ ve bir tarafdan tarîk-i hâs ve taraf-ı râbi‘i tarîk-i âm ile mahdûd cennet-mekân merhûm ve mağfiret-nişân Sultan Bayezid-i Velî Hân aleyhi sicâlü’l-gufrân hazretlerinin evkāf-ı celîleleri müsakkafâtından Yorgi v. Andon’un bi’l-icâreteyn taht-ı tasarruflarında olan şehriye otuz guruş kirâlı Bahçeköylü İstavri şerbethânesi demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla doksan sehm hisse-i şâyi‘ası âharların yedlerinde mülkleri olup mâ‘adâ otuz sehm hisse-i şâyi‘ası dahi babam ve mûrisimiz müteveffâ-yı merkūm Yorgi’nin hayâtında ile’l-fevt yedinde olup bin iki yüz yetmiş beş senesi Saferi’l-hayrının yirminci günü târihiyle müverrah bir kıt‘a sûret mantûkunca yedinde mülkü ve ba‘de fevtihî otuz sehm hisse-i şâyi‘a-i âlât-ı gedik-i mezkûr ber tashîh-i merkūm benimle sâir veresesi merkūmûna mevrûs oldukdan sonra yedimde olup medîne-i Üsküdar mahkemesinden verilen bir kıt‘a ilmühaber mantûkunca merkūmûn Hrisini ve Bobosa ve Panayot ve Aleko ve Luksandıra ve Fotni ve Obeniçe otuz sehm hisse-i şâyi‘a-i âlât-ı gedik-i mezkûrdan ber tashîh-i merkūm mâlik oldukları cem‘an yüz seksen iki sehm hisse-i şâyi‘alarını bin iki yüz yetmiş yedi senesi şehr-i Ramazani’l-mübârekinin yirminci günü mahkeme-i mezkûrede tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ dört bin iki yüz yetmiş dokuz guruş yirmi beş para bir akçe semen-i makbûza bana bey‘ ve temlîk ve vech-i lâyıkıyla teslîm eylediklerinde ben dahi ber-vech-i muharrer iştirâ ve temellük ve tesellüm ve kabz u kabûl edip ol vechile otuz sehm hisse-i şâyi‘a-i âlât-ı gedik-i mezkûrun mecmû‘u benim irsen ve şirâen yedimde mülk ve hakkım olmağla ben âlât-ı gedik-i mezkûrdan ber-minvâl-i muharrer mâlik olduğum otuz sehm hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ ve bâ-ilmühaber-i zecriye beş bin beş yüz guruşa merkūm Yorgi’ye bey‘ ve temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm beş bin beş yüz guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm otuz sehm hisse-i şâyi‘a-i âlât-ı gedik-i mezkûrde benim aslâ ve kat‘â alâka ve medhalim kalmayıp merkūm Yorgi’nin mülk-i müşterâsı ve hakk-ı sırfı olmuşdur dedikde gıbbe’t-tasdîk. Fî 28 Zilka‘de sene 1278 Şuhûdü’l-hâl: Muhzır Feyzullah Ağa b. ( ), Muhzır el-Hâc Yusuf Ağa b. ( ), Muhzır Şakir Ağa b. ( ), Muhzır Süleyman Ağa b. ( ), ve gayruhum