İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 72 Hüküm no: 23 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ergirye bt. Vasil’in babasından kendisine miras kalan tütüncü dükkanındaki hisselerini Marya bt. Abacı Hıristo’ya satması Tütüncü 15000 guruş Kezâlik mahrûse-i Galata hâricinde Müeyyedzâde mahallesinde sâkine teba‘a-i Devlet-i aliyye’nin Rum milleti nisvânından olduğu ba ilmühaber mütehakkık olup şahsı ta‘rîf-i şer‘î ile mu‘arrefe olan Ergirye bt. el-müteveffâ Vasil meclis-i şer‘-i şerîf-i hatîrde mahrûse-i mezkûreye muzâfe kasaba-i Kasımpaşa’ya tâbi‘ Tatavla karyesinde sâkine teba‘a-i Devlet-i aliyye’nin Rum milleti nisvânından olduğu ba ilmühaber mütehakkık olan bâ‘isetü’r-rakīm Marya bt. Abacı Hıristo’nun zevci ve tarafından husûs-ı âti’l-beyânda tasdîka vekîl-i şer‘îsi teba‘a-i Devlet-i aliyye’nin Rum milletinden Tuhafçı Konitoğlu İstrati v. Panayot muvâcehesinde tütüncü esnâfının kethüdâsı el-Hâc Mehmed Latif Efendi b. İsmail ile duhân tüccârından mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel kethüdâ vekîli Ahmed Efendi b. Osman hâzır olduğu hâlde ikrâr-ı tâm ve takrîr-i kelâm edip mahmiye-i İstanbul hısnı ebvâbından bâb-ı Caferî dâhilinde köşede vâki‘ bir tarafdan Kaysula’nın enfîyeci dükkânı ve bir tarafdan mukaddemâ kuşakçı ve el-yevm el-Hâc İbrahim Ağa’nın çorabçı dükkânı ve tarafeyn-i tarîk-i âm ile mahdûd mahmiye-i mezkûrede vâki‘ Ayasofya-i Kebîr Câmi’-i şerîfi evkāfı müsakkafâtından babam müteveffâ-yı merkūm Vasil v. Anderya’dan müntakil benimle kız karındaşım Maryora’nın bi’l-icâreteyn taht-ı tasarrufumuzda olan şehriye beş guruş kirâ-yı kadîmelü bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin nısf hisse-i şâyi‘ası âharların yedlerinde mülkleri olup mâ‘adâ âhar nısf hisse-i şâyi‘ası dahi akd-i âti’z-zikrin sudûruna değin yedimde olan bin iki yüz yetmiş bir senesi Şevvali’l-mükerreminin yedinci günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan Siro[zî]zâde semâhatlü es-Seyyid Mehmed Tahir Efendi hazretlerinin imzâ ve hatemlerini hâviye işbu bir kıt‘a hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedimde mülk ve hakkım olmağla ben âlât-ı gedik-i mezkûrdan ber-minvâl-i muharrer mâlike olduğum âhar nısf hisse-i şâyi‘a-i merkūmeyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ on beş bin guruşa müvekkile-i merkūme Marya’ya bey‘ ve temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı mezkûr on beş bin guruşu tamâmen bana def‘ u teslîm eylediğinde ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-i sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrun âhar nısf hisse-i şâyi‘a-i merkūmesinde benim aslâ ve kat‘â alâka ve medhalim kalmayıp müvekkile-i merkūme Marya’nın mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 4 Zilka‘de sene 1278 Şuhûdü’l-hâl: Muhzır Feyzullah Ağa b. ( ), Muhzır el-Hâc Salih Ağa b. ( ), Muhzır Şakir Ağa b. ( ), Muhzır Ahmed Ağa b. ( ). Tütüncü Apostol v. Yorgi. Buğday dellâlı Karamanlı Yuvanis v. Pretamos, Bâyi‘a-i merkūmenin zevci tüccârdan Yorgi v. Apostolve gayruhum