İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 74 Hüküm no: 24 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü esnâfından Yorgi v. Yani’nin ölümünden sonra mirasçılarına kalan tütüncü dükkanı hisselerinin satışı Tütüncü Kezâlik mahmiye-i İstanbul hısnı ebvâbından Samatya kapısı dâhilinde el-Hâc Hüseyin mahallesinde sâkin iken bundan mukaddem fevt olan teba‘a-i Devlet-i aliyye’nin Rum milletinden ve tütüncü esnâfından Yorgi v. Yani v. Adam’ın verâseti her biri teba‘a-i Devlet-i aliyye’den sulbî kebîr oğulları mânifaturacı Yanko ve esnâf-ı mezkûreden Hıristo ve Nikola ve Terzi Manol ve sulbiye-i kebîre kızları Eleni ve Maryora’ya münhasıra ve tashîh-i mesele-i mîrâsları on sehimden olup sihâm-ı mezkûreden ikişer sehimden sekiz sehmi merkūmûn Yanko ve Hıristo ve Nikola ve Manol’a ve birer sehimden iki sehmi dahi merkūmetân Eleni ve Maryora’ya isâbeti tahakkukundan sonra merkūmûn Hıristo ve Nikola ve Manol ve şahısları mu‘arrefeler merkūmetân Eleni ve Maryora meclis-i şer‘-i şerîf-i hatîrde bâ‘isü’r-rakīm merkūm Yanko muvâcehesinde Âsitâne-i aliyyede vâki‘ tütüncü esnâfının kethüdâsı el-Hâc Mehmed Latif Efendi ile mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel vekîlleri kethüdâ vekîli Ahmed Efendi b. Osman hâzır olduğu hâlde her biri ikrâr-ı tâm ve takrîr-i kelâm edip bâb-ı mezkûr dâhilinde câmeşûycu dükkânı karşısında vâki‘ bir tarafdan Terzi Yanko’nun mukaddemâ sebzevâtcı dükkânı ve hâlâ mağazası ve bir tarafdan Bakkal Tanaş’ın bakkal dükkânı ve bir tarafdan Hacı Hanparsum’un menzili ve taraf-ı râbi‘i tarîk-i âm ile mahdûd şehriye beş guruş kirâlı bir bâb mülk tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmeden her biri babamız ve mûrisimiz müteveffâ-yı merkūm Yorgi’nin hayâtında yedinde olup bin iki yüz elli senesi Zilka‘deti’ş-şerîfesinin yirmi dördüncü günü târihiyle müverrahalar İstanbul Mahkemesi sicillinden muhrece işbu iki kıt‘a kayd-ı hüccet-i şer‘iyye ve kethüdâ-i mezbûrun takdîm eylediği bir kıt‘a ilmühaber nâtıklar olduğu üzere ile’l-fevt yedinde müstakillen mülk ve ba‘de fevtihî ber tashîh-i mezkûr bizimle merkūm Yanko’ya mevrûs olmağla biz akd-i âti’z-zikrin sudûruna değin dükkân ve âlât-ı gedik-i mezkûrlardan ber-minvâl-i muharrer irsen mâlik olduğumuz cem‘an sekiz sehm hisse-i şâyi‘amızı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile yirmi beş bin guruşa karındaşımız merkūm Yanko’ya bey‘ ve temlîk ve vech-i lâyıkıyla teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm yirmi beş bin guruşu tamâmen bize def‘ u teslîm biz dahi yedinden tamâmen ahz u kabz ve bi-kadri’l-hısas beynimizde iktisâm edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik fîmâ-ba’d dükkân ve âlât-ı gedik-i mezkûrların cem‘an sekiz sehm hisse-i şâyi‘a-i mezkûrelerinde bizim aslâ ve kat‘â alâka ve medhalimiz kalmayıp mecmû’ dükkân ve âlât-ı gedik-i mezkûrlar karındaşımız merkūm Yanko’nun irsen ve şirâen mülk-i mahzı ve hakk-ı sırfı olmuşdur dediklerinde gıbbe. Fî 24 Şevval sene 1278 Şuhûdü’l-hâl: Muhzır Feyzullah Ağa b. ( ), Muhzır el-Hâc Salih Ağa b. ( ), Muhzır Şakir Ağa b. ( ), Muhzır Süleyman Ağa b. ( ), ve gayruhum