İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 75 Hüküm no: 25 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Muhtar Bey’in babası tütün tüccârı Hacı Hâfız Mustafa Efendi’den kendisine miras kalan tütüncü mağazası hisselerini satışı Tütüncü 20000 guruş Kezâlik mahmiye-i İstanbul’da Sultan Selim Hân-ı kadîm aleyhi-rahmetü rabbihi’r-rahîm hazretleri Câmi’-i şerîfi civarında Debbâğ Yunus mahallesinde sâkinler iken bin iki yüz yetmiş iki senesi Recebi’l-ferdinin yirmi yedinci günü vefât eden duhân tüccârından el-Hâc Hâfız Mustafa Efendi b. el-Hâc Mehmed bin Abdullah’ın verâseti zevce-i menkûha-i metrûkesi Fâtıma Hatun bt. Abdullah ile sulbî kebîr oğulları asâkir-i bahriye-i şâhâne yüzbaşılarından Abdullah Bey ve duhân tüccârından Ahmed Muhtar Bey ve sulbiye-i kebîre kızı Saide Hanım’a münhasıra ve tashîh-i mesele-i mîrâsları kırk sehimden olup sihâm-ı mezkûreden beş sehmi zevce-i mûmâ-ileyhâ Fâtıma Hatun’a ve on dört sehimden yirmi sekiz sehmi ebnân-ı mûmâ-ileyhimâ Abdullah Bey ve Ahmed Muhtar Bey’e ve yedi sehmi mûmâ-ileyhâ Saide Hanım’a isâbeti tahakkukundan sonra mûmâ-ileyh Ahmed Muhtar Bey meclis-i şer‘-i şerîf-i münîrde bâ‘isetü’l-kitâb mûmâ-ileyhâ Saide Hanım’ın zevci ve tarafından husûs-ı âti’l-beyânda tasdîka vekîl-i şer‘îsi tüccâr-ı mezkûreden Mehmed Asım Efendi b. Mehmed Tahir mahzarında tütüncü esnâfının kethüdâsı el-Hâc Mehmed Latif Efendi b. İsmail ile duhân tüccârından mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel vekîlleri kethüdâ vekîli Ahmed Efendi b. Osman hâzır olduğu hâlde mahmiye-i mezkûrede Asmaaltı nâm mahalde Tahmîshâne kurbünde Parmakkapı ittisâlinde vâki‘ bir tarafdan Bostancı Hân’ı ve bir tarafdan Sabuncu Nuri Ağa mağazası ve tarafeyni tarîk-i âm ile mahdûd merhûme Kethüdâ Serviazâd Hatun Vakfı musakkafâtından pederimiz müteveffâ-yı mezbûr el-Hâc Mustafa Efendi’nin intikālinden benimle mûmâ-ileyh Abdullah Bey ve müvekkile-i mûmâ-ileyhâ Saide Hanım’ın bi’l-icâreteyn eslâsen taht-ı tasarrufumuzda olan şehriye beş guruş kirâlı Yaldızlı mağaza demekle ma‘rûf fevkinde mukaddemâ altı ve el-yevm beş bâb odayı müştemil bir bâb duhânî mağazası derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme pederimiz ve mevrûsumuz müteveffâ-yı mezbûr el-Hâc Hâfız Mustafa Efendi’nin hayâtında ile’l-vefât yedinde olup bin iki yüz elli iki senesi Zilka‘deti’ş-şerîfesinin on sekizinci günü târihiyle müverrah işbu bir kıt‘a sûret ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedinde mülkü ve ba‘de vefâtihî benimle zevce-i mûmâ-ileyhâ Fâtıma Hatun ve mûmâ-ileyh Abdullah Bey ve müvekkile-i mûmâ-ileyhâ Saide Hanım’a ber tashîh-i mezkûr mevrûs olmağla ben âlât-ı gedik-i mezkûrdan ber-minvâl-i muharrer mâlik olduğum on dört sehm hisse-i şâyi‘amı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şerikân yirmi bin guruşa müvekkile-i mûmâ-ileyhâ Saide Hanım’a bey‘ ve temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm yirmi bin guruşa tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrun on dört sehm hisse-i şâyi‘a-i merkūmesinde benim aslâ ve kat‘â alâka ve medhalim kalmayıp âlât-ı gedik mezkûrun yedi sehm hisse-i şâyi‘ası mukaddemâ irsen ve on dört sehm hisse-i şâyi‘ası dahi hâlâ şirâen ki cem‘an yirmi bir sehm hisse-i şâyi‘ası müvekkile-i mûmâ-ileyhâ Saide Hanım’ın mülk-i mahzı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 23 Zilka‘de sene 1278 Şuhûdü’l-hâl: Muhzır Feyzullah Ağa b. ( ), Muhzır el-Hâc Salih Ağa b. ( ), Muhzır Mustafa Ağa b. ( ), Muhzır Süleyman Ağa b. ( ), ve gayruhum