Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 521 Hüküm no: 627 Orijinal metin no: [109a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şahin b. Abdullah’ın köle olmayıp azat edildiğinin tespiti Rıkk-ı sâbıkını mu‘terif olmağla vech-i âtî üzre da‘vâya kıbel-i şer‘den me’zûn olan açık kaşlı ala gözlü orta boylu Rûsiyyü’l-asl hâmil-i hâze’l-kitâb Şâhin b. Abdullah meclis-i şer‘-i şerîf-i enverde mahmiye-i İstanbul’da Arabacı Bayezid mahallesi imâmı iken bundan akdem vefât eden Halil Efendi b. İbrahim b. Mehmed’in verâseti zevcesi Emine nâm hâtun ile sulbî kebîr oğlu Ahmed Çelebi ve sagīr oğlu İbrahim’e münhasıra olduğu şer‘an zâhir ve müte‘ayyin oldukdan sonra tereke-i müteveffâ-yı mezbûrdan olup rık olmak üzre kendiye vâzı‘ü’l-yed olan mezbûr Ahmed Çelebi mahzarında üzerine da‘vâ ve takrîr-i kelâm edip müteveffâ-yı merkūm Halil Efendi târih-i kitâbdan bir sene mukaddem yedinde abd-i memlûkü olduğum hâlde beni malından tahrîr ve i‘tâk ve sâir ahrâr-ı asliyyîn silkine ilhâk ve idrâc edip ben sâir ahrâr-ı asliyyîn gibi hür olmuşiken mezbûr Ahmed Çelebi tereke-i müteveffâ-yı mezbûrdan olup rık olmak üzre bana vaz‘-ı yed eder suâl olunup mezbûrun kasr-ı yedine tenbîh ve sebîlim tahliyye olunmak matlûbumdur dedikde gıbbe’s-suâl mezbûr Ahmed Çelebi cevâbında mevsûf-ı mezbûr ber vech-i muharrer vaz‘-ı yedini ikrâr lâkin mezbûrun ıtkını inkâr edicek mevsûf-ı mezbûrdan müdde‘âsına beyyine taleb olundukda udûl-i müslimînden olup ve mahalle-i mezbûre ahâlîsinden Mustafa Efendi b. Musa ve Abdurrahman Efendi b. Halil ve Ahmed Beşe b. Ali ve Siyavuş b. Abdullah ve Ebûbekir b. Yusuf li ecli’ş-şehâde meclis-i şer‘a hâzırûn olup isre’l-istişhâd fi’l-hakīka müteveffâ-yı mezbûr imâm Halil Efendi b. İbrahim b. Mehmed târih-i kitâbdan bir sene mukaddem abd-i memlûkü işbu mevsûf-ı mezbûr Şâhin [b.] Abdullah’ı bizim huzûrumuzda malından tahrîr ve i‘tâk ve sâir ahrâr-ı asliyyîn silkine idrâc ve ilhâk edip mevsûf-ı mezbûr sâir ahrâr-ı asliyyîn gibi hür olmuşdur biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûl olmağın mûcebiyle mevsûf-ı mezbûrun ıtkına hüküm ve mezbûr Ahmed Çelebi’nin kasr-ı yedine tenbîh olunup mâ vaka‘a bi’t-taleb ketb olundu. Fi’l-yevmi’s-sânî aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Ahmed Çelebi b. Ali, İbrahim Çelebi b. Ahmed, Çavuşzâde Mehmed Çelebi, Hasan b. Mehmed, Receb b. Osman.