İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 76 Hüküm no: 26 Orijinal metin no: [6a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Nefise Hanım bt. müteveffâ Seyyid İbrahim Efendi’nin halasından kendisine miras kalan arsayı satışı Arsa mübâya‘a 2000 guruş Mahmiye-i İstanbul’da Altay Çeşmesi kurbünde Debbâğzâde el-Hâc Hasan mahallesinde sâkine iken işbu târih-i kitâbdan yirmi sene mukaddem fevt olan Şerife Hafize Hanım bt. Ali b. Abdullah’ın li-ebeveyn er karındaşı kızı ve hasren vârisesi olup zâtı mahmiye-i mezbûrede Ebu’l-feth Sultan Mehmed Hân-ı Gâzi aleyhi rahmetü Rabbühü’l-bârî Câmi’-i şerîfi civârında Nişancı Mehmed Paşa mahallesinde sâkin eş-Şeyh Abdülhalim Efendi b. Mehmed Emin ve Rumeli Divân Kalemi muhzırânından Mustafa Ağa b. Ahmed ta‘rîfleriyle mu‘arrefe olan Şerife Nefise Hanım bt. el-müteveffâ es-Seyyid İbrahim Efendi meclis-i şer‘-i şerîf-i lâzımü’t-teşrîfde sâlifü’z-zikr Debbâğzâde el-Hâc Hasan mahallesinde sakine kezâlik zâtı mu‘arrifân-ı merkūmân ta‘rîfleriyle mu‘arrefe olan işbu bâ‘isetü’l-kitâb Şerife Fâtıma Hanım bt. es-Seyyid Mehmed Efendi mahzarında ikrâr-ı tâm ve takrîr-i kelâm edip zikri murûr eden Debbâğzâde el-Hâc Hasan mahallesinde vâki‘ bir tarafdan Akmahmudzâde Vakfı musakkafâtından bostan ve bir tarafdan Dülgerzâde odalı ve bir tarafdan mukaddemâ Hattât Ali Efendi ve el-yevm Yusuf Efendi menzili ve taraf-ı râbi‘i tarîk-i âm ile mahdûd terbî‘an yedi yüz kırk zirâ‘ bir bâb münhedim menzil arsasının terbî‘an iki yüz zirâ‘ mu‘ayyen mahalli beher şehr otuz akçe icâre-i müeccele ile ashâb-ı hayrâtdan merhûm Akmahmudzâde Emin Sinan Vakfı musakkafâtından olarak benim bâ-temessük mütevelli bi’l-icâreteyn taht-ı tasarrufumda ve mâ‘adâ terbî‘an beş yüz kırk zirâ‘ mu‘ayyen mahalli dahi mûrisem müteveffât-ı mezbûre Şerife Hafize Hanım’ın hayâtında yedinde olup bin iki yüz otuz beş senesi şehr-i Rebî‘ülahirinin yirmi altıncı günü târihiyle müverraha Balat mahkemesinden verilen işbu bir kıt‘a mübâya‘a hücceti nâtıka olduğu üzere ile’l-vefât müstakilleten yedinde mülkü olup ba‘de vefâtihâ mülk olan mârrü’l-beyân beş yüz kırk zirâ‘ mahall-i mezkûr dahi ancak bana mevrûs olmağla el-hâletü hâzihî ben akd-i âti’l-beyânın sudûruna değin ber-minvâl-i muharrer irsen mâlike olduğum terbî‘an beş yüz kırk zirâ‘ mülk mahall-i merkūmu tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile mezbûre Şerife Fâtıma Hanım’a iki bin guruşa bey‘ ve temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı mezkûr iki bin guruşu tamâmen bana def‘u teslîm eylediğinde ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve yine her birimiz ber-vech-i muharrer âharın ibrâsını kabûl eyledik, ba‘de’l-yevm arsa-i mahdûde-i mezkûrenin mülk olan terbî‘an beş yüz kırk zirâ‘mu‘ayyen mahallinde benim aslâ ve kat‘â alâka ve medhalim kalmayıp mezbûre Şerife FâtımaHanım’ın mülk-i müşterâsı ve hakk-ı sırfı olmuşdur dedikde gıbbe. Fî 27 Zilhicce sene 1278 Şuhûdü’l-hâl: Eş-şahidune’s-sabıkūn