İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 77 Hüküm no: 27 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tabancacı esnâfı kethüdâsı Ali Bey b. Mehmed’in tabancacı dükkânını Ahmed Ağa b. Halil ile Şerife Atiyetullah Hanım bt. Osman’a satması Tabancacı mübâya‘ası 10000 guruş, nüshateyn Âsitâne-i sa‘âdet-âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen mahmiye-i İstanbul’da Çarşamba Pazarı kurbünde Kumrulu Mescid nâm-ı diğer Mimar Sinan mahallesinde sâkin tabancacı esnâfı kethüdâsı Ali Bey b. Mehmed meclis-i şer‘-i şerîf-i lâzımü’t-teşrîfde mahrûse-i Galata’ya muzâfe kasaba-i Tophane’de Cihangir mahallesinde sâkin esnâf-ı merkūmenin kethüdâ vekîli işbu bâ‘isü’l-kitâb Ahmed Ağa b. Halil ve yine kasaba-i merkūmede Muhyiddin mahallesinde sâkine Kolağası Ali Ağa zevcesi zâtı ta‘rîf-i şer‘î ile mu‘arrefe olan işbu bâ‘isetü’l-vesîka Şerife Atiyetullah Hanım bt. Osman mahzarlarında esnâf-ı merkūmeden Mehmed Ağa b. Salih ve es-Seyyid Mehmed Lütfü Efendi b. es-Seyyid Mehmed Said ve Mustafa Ağa b. İsmail hâzır oldukları hâlde ikrâr-ı tâm ve takrîr-i kelâm edip mahmiye-i mezbûrede Parmakkapı nâm mahalde tabancacılar sûkunda kâin bir tarafdan mukaddemâ Mehmed Ağa ve el-yevm kāimmakām el-Hâc Mustafa Bey dükkânı ve bir tarafdan mukaddemâ Bilal Ağa ve el-yevm Âişe Hatun dükkânı ve bir tarafdan Yolgeçen Hân’ı demekle arîf han ve taraf-ı râbi‘i tarîk-i âm ile mahdûd Hoca Pîrî Vakfı’ndan olarak şehriye otuz akçe icâre-i müecceleli kadîm bir bâb tabancacı dükkânı Âişe Hatun bt. Abdullah’ın bâ-temessük-i mütevelli bi’l-icâreteyn taht-ı tasarrufunda ve dükkân-ı mahdûd-ı mezkûr derûnunda mevcûd olup yedlerinde olan sûret-i fermân-ı âlîde mukayyed gediklerden beyne’l-esnâf tabancacı gediği ta‘bîr olunur bâ-defter-i müfredât âlât-ı lâzime-i ma‘lûme dahi yedimde olup bin iki yüz elli altı senesi Zilka‘de’ş-şerîfesinin dokuzuncu günü târihiyle müverrah ve ol târihde Rumeli kādıaskeri olan Abdülhak Efendi merhûmun hatemini hâviye işbu bir kıt‘a bir kıt‘a i‘lâm-ı şer‘î mûcebince akd-i âti’z-zikrin sudûruna değin müstakillen yedimde mülk ve hakkım olup hattâ esnâf-ı hâzirûn-ı merkūmûn dahi benim ber-vech-i muharrer âlât-ı gedik-i mezkûr mülküm olduğunu huzûr-ı şer‘-i şerîfde ihbâr etmeleriyle el-hâletü hâzihî ben ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûrân Ahmed Ağa ve Atiyetullah Hanım’a on bin guruşa ale’l-iştirâki’s-seviy bey‘ ve temlîk ve teslîm eylediğimde onlar dahi ber-minvâl-i muharrer seviyyen iştirâ ve temellük ve tesellüm ve kabz u kabûl edip semeni olan meblağ-ı mezkûr on bin guruşu seviyyen bana def‘ u teslîm eylediklerinde ben dahi yedlerinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-minvâl-i muharrer âharın ibrâsını kabûl eyledik, ba‘de’l-yevm âlât-ı gedik-i mezkûrde benim aslâ ve kat‘â alâka ve medhalim kalmayıp mezbûrân Ahmed Ağa ve Atiyetullah Hanım’ın seviyyen mülk-i müşterâları ve hakk-ı sırfları olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 25 Zilhicce sene 1278 Şuhûdü’l-hâl: Muhzır Süleyman Ağa b. ( ), Muhzır Mustafa Ağa b. ( ), Muhzır el-Hâc Salih Ağa b. ( ), Muhzır Feyzullah Ağa b. ( ), ve gayruhum