İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 79 Hüküm no: 28 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anaştaşya bt. Kosta’nın sahip olduğu şerbethâne hisselerini satışı Şerbethâne 15 sehm 26000 guruş Kezâlik mahrûse-i Galata’ya muzâfe Arnavud karyesinde sâkine teba‘a-i Devlet-i aliyye’nin Rum milleti nisvânından şerbethâneci Kör Todori zevcesi demekle meşhûre şahsı ta‘rîf-i şer‘î ile mu‘arrefe olan Anaştaşya bt. Kosta meclis-i şer‘-i şerîf-i hatîrde medîne-i Hazret-i Ebâ Eyüb el-Ensârî radiye anh rabbühü’l-bârîde Baba Haydar mahallesinde sâkin teba‘a-i Devlet-i aliyye’nin Ermeni milletinden olduğu bâ-ilmühaber mütehakkık olan bâ‘isü’r-rakīm Üzengicioğlu Üzengici Togofil v. Bogos muvâcehesinde her biri teba‘a-i Devlet-i aliyye’nin Rum milletinden ve esnâf-ı merkūmenin Beyoğlu kolu ustabaşısı Dülbendcioğlu Andon v. Ohannes ve esnâfından Kosta v. Adam hâzır oldukları hâlde ikrâr-ı tâm ve takrîr-i kelâm edip mahrûse-i Galata’da Karaköy kapısı civârında françalacı fırını ittisâlinde vâki‘ bir tarafdan Terzibâşı Levi mağazası ve bir tarafdan Karakahyaoğlu Hoca Kigork’ın zevcesi Marya’nın mukaddemâ françalacı ve el-yevm han ve bir tarafdan Ezmerağda’nın mağazası ve taraf-ı râbi‘i tarîk-i âm ile mahdûd merhûm Mustafa Ağa Vakfı müsakkafâtından Agop’un taht-ı tasarrufunda olan şehriye yüz yirmi guruş kirâlı Sava şerbethânesi demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla yüz beş sehm hisse-i şâyi‘ası âharların yedlerinde mülkleri olup mâ‘adâ on beş sehm hisse-i şâyi‘ası dahi akd-i âti’z-zikrin sudûruna değin yedimde olup bin iki yüz yetmiş iki senesi şehr-i Ramazani’l-mübârekinin on birinci günü târihiyle müverrah ve ol târihde rüsûm-i zecriye muhassılı olan sa‘âdetlü Rüstem Paşa’nın mührüyle memhûr işbu bir kıt‘a sûret ve hâlâ rüsûm-i zecriye nâzırı izzetlü Hüseyin Ağa’nın bir kıt‘a ilmühaber mantûklarınca yedimde mülk ve hakkım olmağla ben âlât-ı gedik-i mezkûrdan ber-minvâl-i muharrer mâlike olduğum on beş sehm hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ yirmi altı bin guruşa merkūm Togofil’e bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm yirmi altı bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrun on beş sehm hisse-i şâyi‘a-i merkūmesinde benim aslâ ve kat‘â alâka ve medhalim kalmayıp merkūm Tagofil’in mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 28 Zilka‘de sene 1278 Şuhûdü’l-hâl: Muhzır Şakir Ağa b. ( ), Muhzır Mustafa Ağa b. ( ), Muhzır el-Hâc Salih Ağa b. ( ), Muhzır Feyzullah Ağa b. ( ), ve gayruhum