İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 80 Hüküm no: 29 Orijinal metin no: [6b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnâfından Yanko v. Esteryo’nun bakkal dükkânını Ergirili Yorgi, Yani ve Kosta kardeşlere satması Bakkal mübâya‘ası 60000 guruş, Kaydı ihrâc şüd fî 17 Ra sene 306 Kezâlik teba‘a-i Devlet-i aliyye’nin Rum milletinden ve bakkal esnâfından Yanko v. Esteryo meclis-i şer‘-i şerîf-i hatîrde Havâss-ı Refî‘a kazasına muzâfe kasaba-i Hasköy’de kasab olup teba‘a-i Devlet-i aliyye’nin Rum milletinden olduğu bâ-ilmühaber mütehakkık olan bâ‘isü’r-rakīm Ergirili Yorgi ve. Yani ve Kosti evlâdi’l-müteveffâ Nikola Fiço muvâcehelerinde esnâf-ı merkūme kethüdâsı Ahmed Efendi tarafından mürsel esnâf-ı merkūmenin çavuşu teba‘a-i Devlet-i aliyye’den Sava v. Vasil hâzır olduğu hâlde ikrâr-ı tâm ve takrîr-i kelâm edip mahmiye-i İstanbul hısnı ebvâbından Balatkapısı dâhilinde vâki‘ bir tarafdan Mustafa Ağa dükkânı ve bir tarafdan Şekerci Ali Ağa dükkânı ve bir tarafdan Aşçı Anaştaş dükkânı ve taraf-ı râbi‘i tarîk-i âm ile mahdûd mahmiye-i mahkiyede vâki‘ Ayasofya-i Kebîr Câmi’-i şerîfi evkāf-ı celîlesi müsakkafâtından benim bi’l-icâreteyn taht-ı tasarrufumda olan şehriye on beş guruş kirâlı Osman Ağa dükkânı demekle arîf kadîm bir bâb bakkal dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme akd-i âti’z-zikrin sudûruna değin yedimde olup bin iki yüz yetmiş altı senesi Şa‘bânü’l-mu‘azzamının yedinci günü târihiyle müverraha ve ol târihde İstanbul Bâb mahkemesi nâibi olan müderrisîn-i kirâmdan mekremetlü Harputî es-Seyyid Mustafa Faik Efendi’nin imzâ ve hateminihâviye işbu bir kıt‘a hücccet-i şer‘iyye ve kethüdâ-yı mezbûr Ahmed Efendi’nin takdîm eylediği bir kıt‘a ilmühaber mantûklarınca yedimde müstakillen mülk ve hakkım olmağla ben ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile altmış iki bin guruşa merkūmûn Yorgi ve Yani ve Kosti’ye seviyyen bey‘ ve temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabz u kabûl eylediklerinden sonra semeni olan meblağ-ı merkūm altmış iki bin guruşu tamamen bana def‘ u teslîm ben dahi yedlerinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlumuzu hâvî ibrâ vü ıskāt eyledik ba‘de’l-yevm âlât-ı gedik-i mezkûrde benim aslâ ve kat‘âalâka ve medhalim kalmayıp merkūmûn Yorgi ve Yani ve Kosti’nin ale’l-iştirâki’s-seviy mülk-i müşterâları ve hakk-ı sırfları olmuşdur dedikde gıbbe’t-tasdîk. Fî 9 Şevval sene 1278 Şuhûdü’l-hâl: Eş-şahidune’s-sabıkūn