İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 81 Hüküm no: 30 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yavakim v. Lefter’in bakkal dükkânındaki hisselerini ortaklardan Filib’e satması Bakkal mübâya‘ası 15000 guruş,. Kaydı ihrâc şüd fî 10 S sene 324 Kezâlik teba‘a-i Devlet-i aliyye’nin Rum milletinden ve bakkal esnâfından Yavakim v. Lefter meclis-i şer‘-i hatîr-i lâzımü’t-tevkīrde yine teba‘a-i Devlet-i aliyye’den ve millet-i merkūmeden olduğu bâ-ilmühaber mütehakkık olan esnâf-ı merkūmeden işbu hâmilü’r-rakīm Bıyıklı? Tellioğlu Filib v. Sava muvâcehesinde esnâf-ı merkūme pazarbaşısı Ahmed Efendi tarafından mürsel Havâss-ı Refî‘a kazâsına muzâfe kasaba-i Hasköy Çarıkbaşısı Lazko v. Tarandafil ile esnâf-ı merkūmeden Kosta Kosti v. Anaştaş hâzır oldukları hâlde ikrâr-ı tâm ve takrîr-i kelâm edip kasaba-i mezkûrede Aynalıkavak nâm mahalde vâki‘ bir tarafdan kasâb Vasil dükkânı ve bir tarafdan Nişan mağazası ve bir tarafdan dinkhâne ve taraf-ı râbi‘i tarîk-i âm ile mahdûd Koca Yusuf Paşa Vakfı’ndan Bakkal İstelyanos v. Yuvan ve Braşkoya v. Anaştaş ve Baroka v. Anaştaş’ın iştirâken taht-ı tasarruflarında olan Yusuf Paşa dükkânı demekle arîf bir bâb bakkal dükkânı derûnunda mevcûde beher şehr yedi guruş kirâ-yı kadîmelü beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla sekiz sehm hisse-i şâyi‘ası ber-vech-i vakfiyyet âharların ve yirmi sehm hisse-i şâyi‘ası kezâlik ber-vech-i vakfiyyet ve bâ-temessük-i mütevelli merkūm Filib’in ve yirmi sehm hisse-i şâyi‘ası dahi yedimde olup bin iki yüz altmış üç senesi Cemâziyelâhiresi’nin dördüncü günü tarihiyle müverraha ve ol târihde Galata kādısı bulunan Ali Bedreddin Efendi merhûmun bir kıt‘a i‘lâmı mûcebince yedimde mülk ve hakkım olup hattâ esnâf-ı hâzirân-ı merkūmân dahi âlât-ı gedik-i mezkûrun yirmi sehm hisse-i şâyi‘ası ber mûceb-i hüccet benim mülküm olduğunu ihbâr ve pazarbaşı mûmâ-ileyh dahi bir kıt‘a memhûr ilmühaber i‘tâ etmekle el-hâletü hâzihî ben ber-minvâl-i muharrer mâlik olduğum yirmi sehm hisse-i şâyi‘amı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Filib’e on beş bin guruşa bey‘ ve temlîk ve vech-i lâyıkıyla teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz u kabûl edip semeni olan meblağ-ı mezkûr on beş bin guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-minvâl-i muharrer âharın ibrâsını kabûl eyledik, ba‘de’l-yevm yirmi sehm hisse-i şâyi‘a-i âlât-ı gedik-i mezkûrde benim aslâ ve kat‘â alâka ve medhalim kalmayıp merkūm Filib’in mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 19 Zilhicce sene 1278 Şuhûdü’l-hâl: Muhzır Mustafa Ağa b. ( ), Muhzır Şakir Ağa b. ( ), Muhzır el-Hâc Salih Ağa b. ( ), Muhzır Feyzullah Ağa b. ( ), ve gayruhum