İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 82 Hüküm no: 31 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Reis b. Süleyman’ın mirasçılarına kalan abacı dükkânının satışı Abacı mübâya‘ası 10200 guruş Kezâlik medîne-i Üsküdar’a muzâfe Yoros nâhiyesine tâbi‘ Anadolukavağı’nda sâkin iken işbu târih-i kitâbdan altı ay mukaddem vefât eden sefine reislerinden Süleyman Reis b. Süleyman b. Abdullah’ın verâseti zevce-i menkûha-i metrûkesi Âişe Hanım bt. İbrahim ile sulbî kebîr oğlu Eyüb Efendi ve sulbiye-i kebîre kızları Emine Hanım ve Fâtıma Firdevs Hanım ve Saliha Hanım ve Havva Hanım’a münhasıra ve tashîh-i mes’ele-i mirâsları kırk sekiz sehimden olup sihâm-ı mezkûreden altı sehmi zevce-i mezbûre Âişe Hanım’a ve on dört sehmi ibn-i mezbûr Eyüb Efendi’ye ve yedişer sehimden yirmi sekiz sehmi dahi benât-ı mezbûrât Emine Hanım ve Fâtıma Firdevs Hanım ve Saliha Hanım ve Havva Hanım’a isâbeti tahakkukdan sonra verese-i merkūmeden nefsinden asîl ve kerîmesi mezbûre Emine Hanım tarafından husûs-ı âti’l-beyânda vekîl olduğu zâtlarını bi’l-ma‘rifeti’ş-şer‘iyye ârifân demirci esnâfı kethüdâsı İbrahim Ağa b. Veliyüddin ve esnâf-ı merkūme yiğitbaşısı Osman Efendi b. Mustafa şehâdetleriyle ber-nehc -i şer‘î sâbit olan zevce-i mezbûre Âişe Hanım kezâlik nefsinden asîl ve li-ebeveyn hemşireleri kezâlik zâtları mu‘arrefeler mezbûrât Fâtıma Firdevs Hanım ve Saliha Hanım ve Havva Hanım taraflarından husûs-ı âti’l-beyânda vekîl-i müseccel-i şer‘îleri ibn-i mezbûr Eyüb Efendi hâzır olduğu hâlde meclis-i şer‘-i şerîf-i enverde mahrûse-i Galata’ya muzâfe kasaba-i Tophane’de Cihangir mahallesinde sâkinler kezâlik mu‘arrefetü’z-zât Necibe Hanım bt. Ahmed Efendi’nin li-ebeveyn er karındaşı ve tarafından husûs-ı âti’z-zikrde tasdîka vekîl-i şer‘îsi Hâcegân-ı Divân-ı hümâyûndan es-Seyyid Mehmed Sabit Efendi muvacehesinde abacı esnâfı kethüdâsı İbrahim Ağa b. Osman ve mahrûse-i mezkûre münâdîlerinden Mehmed İzzet Efendi b. Osman hâzır oldukları hâlde her biri bi’l-asâle ve bi’l-vekâle ikrâr-ı tâm ve takrîr-i kelâm edip mahrûse-i merkūme hısnı ebvâbından Kürekçi kapısı hâricinde Kalafatyeri’nde vâki‘ bir tarafdan Tarakçı Emin Ağa’nın terzi dükkânı ve bir tarafdan Ustabaşı Nikoli terzi dükkânı ve bir tarafdan yelkenci kethüdâsı Hasan Ağa’nın dükkânı taraf-ı râbi‘i tarîk-i âm ile mahdûd Ayasofya-i Kebîr Câmi’-i şerîfi vakfından Kasâb el-Hâc Hüseyin Ağa’nın taht-ı tasarrufunda olan bir bâb vakıf abacı dükkânı derûnunda mevcûde beyne’l-esnâf abacı terzisi gediği ta‘bîr olunur esnâf-ı merkūmenin ba-fermân-ı âlî şurût-ı nizâmlarında dâhil otuz üç aded gediklerden ma‘dûd şehriye iki guruş kirâ-yı kadîmelü âlât-ı lâzime-i ma‘lûme yedimizde olup bin iki yüz otuz dört senesi Cumâdelulâsı’nın on altı günü târihiyle müverraha ve ol târihde mahrûse-i merkūme kādısı bulunan Salih Efendizâde hafîdi es-Seyyid Mehmed Şeref Efendi merhûmun imzâ ve hatemini hâviye işbu bir kıt‘a hüccet-i şer‘iyye mûcebince mûrisimiz müteveffâ-yı mezbûr Süleyman Reis’in hayâtında ile’l-vefât müstakillen yedinde mâlı ba‘de vefâtihî ber tashîh-i mezkûr benimle kerîmem ve müvekkilelerim mezbûre Emine Hanım ve hâzır-ı merkūm Eyüb Efendi ve müvekkilât-ı mezbûrât Fâtıma Firdevs Hanım ve Saliha Hanım ve Havva Hanım’a mevrûs olmağla el-hâletü hâzihî ben ber-vech-i muharrer bi’l-asâle ve bi’l-vekâle ve hazır-ı asîl ve vekîl-i merkūm Eyüb Efendi dahi kezâlik bi’l-asâle ve bi’l-vekâle âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkile-i mezbûre Necibe Hanım’a bâ-ilmühaber on bin iki yüz guruşa bey‘ ve temlîk ve teslîm eylediğimizde vekîl-i mûmâ-ileyh es-Seyyid Mehmed Sabit Efendi dahi müvekkilesi mezbûre için ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm on iki bin iki yüz guruşu bize tamâmen def‘ u teslîm biz dahi yedinden bi’t-tamâm ve’l-kemâl ahz u kabz edip ve ber mûcib-i hısas beynimizde iktisâm edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz bi’l-asâle ve bi’l-vekâle âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-vech-i muharrer âharın ibrâsını kabûl eyleyip ba‘de’l-yevm âlât-ı gedik-i mezkûr müstakillen müvekkile-i mezbûre Necibe Hanım’ın mülk-i müşterâsı ve hakk-ı sırfı olup bizim ve müvekkilât-ı mezbûrâtın asla ve kat’a alâka ve medhalimiz kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 17 Zilhicce sene 1278 Şuhûdü’l-hâl: Eş-şahidune’s-sabıkūn