İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 83 Hüküm no: 32 Orijinal metin no: [7a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agop v. Avakim’den kendilerine miras kalan uncu değirmeni hisselerinin mülkleri olduğuna dair hüccet talebi Değirmen Kezâlik vilâyet-i Anadolu’da Eğin kazasına tâbi‘ İliç karyesinde sâkin iken bundan mukaddem fevt olan teba‘a-i Devlet-i aliyye’nin Ermeni milletinden ve uncu esnâfından Agop v. Avakim v. Adam’ın verâseti her biri teba‘a-i Devlet-i aliyye’den zevce-i metrûkesi karye-i mezkûrede sâkine Margarita bt. Agya v. Adam ile sulbî kebîr oğlu Nişan ve sulbiye-i kebîre kızı Haropsima’ya münhasıra ve tashîh-i mesele-i mirâsları yirmi dört sehimden olup sihâm-ı mezkûreden üç sehmi zevce-i merkūme Margarita’ya ve on dört sehmi merkūm Nişan’a ve yedi sehmi dahi merkūme Haropsima’ya isâbeti lede’ş-şer‘î’l-enver zâhir ve mütehakkık oldukdan sonra verese-i merkūmûn Margarita ve Nişan ve Haropsima taraflarından husûs-ı âti’l-beyânda vekîl-i şer‘iyyeleri teba‘a-i Devlet-i aliyye’nin Ermeni milletinden ve esnâf-ı merkūmeden Davit v. el-merkūm Avakim meclis-i şer‘-i hatîrde Âsitâne-i aliyye ve bilâd-ı selâsede vâki‘ ekmekçi ve françalacı ve uncu esnâfının kethüdâsı İbrahim Ağa b. Ahmed ile mazbûtü’l-esâmî nizâm ustaları taraflarından mürsel esnâf-ı merkūme yiğitbaşısı es-Seyyid İsmail Efendi b. Mehmed Emin ve salıcılarından el-Hâc Ahmed Ağa b. Mehmed ve Topal İbrahim Edhem Ağa b. Ali hâzır oldukları hâlde bi’l-vekâle takrîr-i kelâm ve ta‘bîr ani’l-merâm edip mahrûse-i Galata’da Kireçkapısı dâhilinde Sultan Bayezid mahallesinde kâin bir tarafdan Çiloğlu Mardiros değirmeni ve bir tarafdan Hacı Kabril değirmeni ve bir tarafdan ba‘zen Alyanak Osman Ağa değirmeni ve ba‘zen Ligoraki değirmeni taraf-ı râbi‘i mahalle-i mezkûre câmi’i ve tarîk-i âm ile mahdûd merhûm Mehmed Efendi Vakfı müsakkafâtından Mardiros ve Penbe veledey Toros’un bi’l-icâreteyn taht-ı tasarrufunda olan şehriye on beş guruş kirâlı Sâğır değirmeni demekle arîf üç horoslu bir bâb uncu [7b] değirmeni derûnunda mevcûde beyne’l-esnâf gedik ta‘bîr olunur on iki re’s bârgir ve onlara tâbi‘ sâir âlât-ı lâzime-i ma‘lûmenin on re’s bârgir on altı mıh ve onlara îcâb eden âlât-ı sâiresi âharların ve on altı mıh ve ona isâbet eden âlât-ı sâiresi benim yedimizde mülkümüz olup ma‘âda ona altı mıh ve iktizâ eden âlât-ı sâiresi dahi karındaşım müteveffâ-yı merkūm Agop’un hâyatında ile’l-fevt yedinde olup bin iki yüz elli beş senesi Muharremü’l-harâmının on yedinci günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan Reîsü’l-küttâb Arif Efendizâde Mehmed Raif Beyefendi merhûmun imzâ ve hateminihâviye işbu bir kıt‘a hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedinde mülkü ve ba‘de fevtihî sâlifü’l-beyân on altı mıh ve ona iktizâ eden âlât-ı sâire ber tashîh-i mezkûr müvekkillerim merkūmûn Margarita ve Nişan ve Haropsima’ya mevrûs olup sâlifü’l-beyân on altı mıh ve ona iktizâ eden âlât-ı sâire ber-minvâl-i muharrer müvekkillerim merkūmûn Margarita ve Nişan ve Haropsima’nın mülkleri olduğunu nâtık yedlerinde sened-i şer‘î olmamağla hakīkat-ı hâl husûs-ı mezkûre vukūf-ı tâmları olan kimesnelerden istihbâr ve suâl olunup haberleri tahrîr ve imlâ ile zikr olunan on altı mıh ve ona iktizâ eden âlât-ı sâire ber-minvâl-i meşrûh müvekkillerim merkūmûnun olduğunu nâtıka kıbel-i şer‘den bir kıt‘a hüccet tahrîr ve i‘tâ buyurulmak matlûbumdur deyu bi’l-vekâle istid‘â ettikde hâl vekîl-i merkūm Davit’in bâlâda bast ve beyân eylediği minvâl-i muharrer üzere olduğunu husûs-ı mezkûre vukūf-ı tâmları olan esnâf-ı hâzirûn-ı mezbûrûn alâ tarîki’ş-şehâde haber vermeleriyle vâki‘-i hâl hıfzan li’l-makāl işbu vesîka-i enîka ketb olundu. Fî 26 Zilhicce sene 1278 Şuhûdü’l-hâl: Muhzır Şakir Ağa b. ( ), Muhzır Mustafa Ağa b. ( ), Muhzır el-Hâc Yusuf Ağa b. ( ), Muhzır Feyzullah Ağa b. ( ), ve gayruhum