İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 85 Hüküm no: 33 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Margarita’nın Agop v. Avakim’den kendisine miras kalan değirmen hisselerini diğer mirasçılardan oğlu Nişan’a satması Üç sehm hisse-i değirmen 500 guruş Kezâlik vilâyet-i Anadolu’da Eğin kazasına tâbi‘ İliç karyesinde sâkin iken bundan mukaddem fevt olan teba‘a-i Devlet-i aliyyenin Ermeni milletinden ve uncu esnâfından Agop v. Avakim v. Adam’ın verâseti her biri teba‘a-i Devlet-i aliyye’den zevce-i metrûkesi karye-i mezkûrede sâkine Margarita bt. Ağya v. Adam ile sulbî kebîr oğlu Nişan ve sulbiye-i kebîre kızı Haropsima’ya münhasıra ve tashîh-i mes’ele-i mirâsları yirmi dört sehimden olup sihâm-ı mezkûreden üç sehmi zevce-i merkūme Margarita’ya ve on dört sehmi merkūm Nişan’a ve yedi sehmi dahi merkūme Haropsima’ya isâbeti lede’ş-şer‘i’l-enver zâhir ve mütehakkık olan merkūme Margarita tarafından husûs-ı âti’l-beyânda bâ-hüccet-i şer‘iyye vekîli olduğu şahsını bilirler her biri teba‘a-i Devlet-i aliyye’nin Ermeni milletinden ve karye-i merkūme ahâlisinden ve mahrûse-i Galata’da Kapıiçi nâm mahalde vâki‘ ekmekçi fırınında ekmekçi olan Eskioğlu Kigork v. Haçador ve medîne-i Üsküdar’a muzâfe Yoros nâhiyesine tâbi‘ Anadolukavağı karyesinde vâki‘ ekmekçi fırınında destgâhdâr olan Baloğlu Avakim v. İsteban şehâdetleriyle ber-nehc -i şer‘î sâbit olan teba‘a-i Devlet-i aliyye’nin Ermeni milletinden ve esnâf-ı mezkûreden Davit v. el-merkūm Evakim meclis-i şer‘-i hatîrde bâ‘isü’r-rakīm merkūm Nişan tarafından husûs-ı âti’l-beyânda tasdîka vekîl-i şer‘îsi teba‘a-i Devlet-i aliyyenin Ermeni milletinden ve ekmekçi esnâfından Ohannes v. Anderyas muvâcehesinde Âsitâne-i aliyye ve bilâd-ı selâsede vâki‘ ekmekçi ve françalacı ve uncu esnâfının kethüdâsı İbrahim Ağa b. Ahmed ile mazbûtü’l-esâmî nizâm ustaları taraflarından mürsel esnâf-ı merkūme yiğitbaşısı es-Seyyid İsmail Efendi b. Mehmed Emin hâzır olduğu hâlde bi’l-vekâle ikrâr-ı tâm ve takrîr-i kelâm edip mahrûse-i mezkûrede Kireçkapısı dâhilinde Sultan Bayezid mahallesinde kâin bir tarafdan Çiloğlu Mardiros değirmeni ve bir tarafdan Hacı Kabril değirmeni ve bir tarafdan ba‘zen Alyanak Osman Ağa değirmeni ve ba‘zen Ligoraki değirmeni ve taraf-ı râbi‘i mahalle-i mezkûre câmi’i ve tarîk-i âm ile mahdûd merhûm Mehmed Efendi Vakfı müsakkafâtından Mardiros ve Penbe v. Toros’un bi’l-icâreteyn taht-ı tasarruflarında olan şehriye on beş guruş kirâlı Sâğır değirmeni demekle arîf üç horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur on iki re’s bârgir ve onlara tâbi‘ sâir âlât-ı lâzime-i ma‘lûmenin on re’s bârgir on altı mıh ve onlara îcâb eden âlât-ı sâiresi âharların ve on altı mıh ve ona isâbet eden âlât-ı sâiresi benim yedimizde mülkümüz olup ma‘âda on altı mıh ve ona iktizâ eden âlât-ı sâiresi dahi karındaşım müteveffâ-yı merkūm Agop’un hâyatında ile’l-fevt yedimde olup bin iki yüz elli beş senesi Muharremü’l-harâmının on yedinci günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan Reîsü’l-küttâb Arif Efendizâde Mehmed Raif Beyefendi merhûmun imzâ ve hateminihâviye işbu bir kıt‘a hüccet-i şer‘iyye ve kethüdâ-yı merkūmun takdîm eylediği bir kıt‘a ilmühaber mantûklarınca yedinde mülkü ve ba‘de fevtihî sâlifü’l-beyân on altı mıh ve ona iktizâ eden âlât-ı sâiresi ber tashîh-i merkūm müvekkilem merkūme Margarita ile müvekkil-i merkūm Nişan ve merkūme Haropsima’ya mevrûs olmağla ben zikr olunan on altı mıh ve ona iktizâ eden âlât-ı sâireden müvekkilem merkūme Margarita’nın ber-minvâl-i muharrer mâlike olduğu üç sehm hisse-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-işer‘î ve safka-i vâhide ile bâ-izn-i şürekâ beş yüz guruşa müvekkil-i merkūm Nişan’a bi’l-vekâle bey‘ ve temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm beş yüz guruşu tamâmen bana def‘ u teslîm ben dahi yedinden bi’l-vekâle tamâmen ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî bi’l-asâle ve izâfetle bi’l-vekâle ibrâ vü ıskāt eyledik ba‘de’l-yevm sâlifü’l-beyân on altı mıh ve ona iktizâ eden âlât-ı sâirenin ber-tashîh-i merkūm üç sehm hisse-i şâyi‘asında müvekkilem merkūme Margarita’nın aslâ ve kat‘â alâka ve medhali kalmayıp zikr olunan on altı mıh ve ona iktizâ eden âlât-ı sâirenin on dört sehm hisse-i şâyi‘ası mükaddemâ irsen ve üç sehm hisse-i şâyi‘ası dahi hâlâ şirâen ki cem‘an on yedi hisse-i şâyi‘ası müvekkil-i merkūm Nişan’ın mülk-i mahz ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 27 Zilhicce sene 1278 Şuhûdü’l-hâl: Eş-şahidune’s-sabıkūn