İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 86 Hüküm no: 34 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hazer v. Nahabet’in Zeliha Hanım bt. Halil’den aldığı borçla ilgili muamele İdâne 32500 guruş Mahmiye-i İstanbul’da Laleli Câmi’-i şerîfi kurbünde Koska nâm mahalde vâki‘ Koska fırını demekle ma‘rûf françalacı fırını ustası teba‘a-i Devlet-i aliyye’nin Ermeni milletinden Hazer v. Nahabet meclis-i şer‘-i hatîr-i lâzımü’t-tevkīrde yine mahmiye-i merkūmede Sultan Bayezid-i Velî Hân hazretleri mahallesinde sâkine sudûr-ı izâmdan Çerkeşî merhûm Mehmed Rafi Efendi halîlesi olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Zeliha Hanım bt. Halil muvâcehesinde ikrâr-ı tâm ve takrîr-i kelâm edip ben mûmâ-ileyha Zeliha Hanım’ın mâlından ve yedinden zikri âtî istidâne ve kabz edeceğim meblağ ve bâ-devr-i şer‘î ilzâm-ı rıbhı mukābelesinde Havâss-ı Refî‘a kazâsına muzâfe Hasköy kasabasında Pîrî Paşa mahallesinde vâki‘ Pîrî Paşa değirmeni demekle arîf değirmen derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzime-i ma‘lûmesinden bâ-hüccet-i şer‘iyye mâlik olduğum üç buçuk re’s bârgir ve onlara isâbet eden âlât-ı lâzime-i ma‘lûme ve mahmiye-i mezbûre hısnı ebvâbından Ayvansaray kapısı dâhilinde hamam ittisâlinde vâki‘ uncu değirmeni derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmede bâ-hüccet-i şer‘iyye mâlik olduğum üç re’s bârgir ve onlara muktezî âlât-ı lâzime-i ma‘lûme hisselerimi rehin vaz‘ ve Hanım-ı mûmâ-ileyhâya vech-i lâyıkı üzere teslîm eylediğimde ol dahi ber-vech-i muharrer irtihân ve tesellüm ve kabz u kabûl eyledikden sonra mûmâ-ileyhâ Zeliha Hanım hises-i mezkûreyi li ecli’l-isti‘mâl yine bana i‘âde ve teslîm eylediğinde ben dahi ba‘de’l-isti‘âre ve’l-kabz mûmâ-ileyhâ Zeliha Hanım bana mâlından otuz iki bin beş yüz guruş idâne ve teslîm eylediğinde ben dahi yedinden istidâne ve kabz ve umûruma sarfla istihlâk edip meblağ-ı mezkûr ile semeni işbu târih-i vesîkadan üç sene tamamına değin müeccel ve mev‘ûduna hânım-ı mûmâ-ileyhânın mâlından ve yedinden be-safka-i vâhide [8a] iştirâ ve kabz eylediğim iki aded hilâlî koyun sâ‘ati semenlerinden dahi on dört bin altı yüz yirmi beş guruş ki ciheteyn-i mezkûreteynden cem‘an kırk yedi bin yüz yirmi beş guruş zimmetimde mûmâ-ileyhâ Zeliha Hanım’a vâcibü’l-edâ ve lâzimü’l-kazâ sahîhan deynim olmağla eğer ben deynim olan meblağ-ı mecmû‘-ı mezkûru ecl-i mezkû[r] hulûlünde edâ ile fekk-i rehin müyesser olmaz ise hises-i mezkûreyi semen-i misilleriyle âhara bey‘a ve kabz-ı semen ve makbûzundan deyn-i mecmû‘-ı mezkûru Hanım-ı mûmâ-ileyhâya edâya ve fazla kalır ise fazla-i merkūmeyi bana teslîme ve husûs-ı mezkûrun mütevakkıf olduğu umûrun küllisine küllemâ azeltüke fe-ente vekîlî mefhûmu üzere azil ve in‘izâlden masûne ve hîn-i akd-i rehinde meşrûta vekâlet-i devriye-i sahîha-i şer‘iyye ile işbu hâzır bi’l-meclis Hasköylü Mehmed Emin Efendi b. el-Hâc Halil tarafımdan vekîl ve nâib-i menâb nasb ve ta‘yîn eylediğimde ol dahi vekâlet-i mezkûreyi kabûl ve hizmet-i lâzimesini edâya ta‘ahhüd eyledi dedikde gıbbe’t-tasdîk mukırr-ı medyûn-ı merkūmun li-ebeveyn er karındaşları Melkon ve Toros ve li-ebeveyn ammi oğlu Nişan v. Ağya ve mârru’z-zikr Pîrî Paşa mahallesinde sâkinler şerîki Sahak v. Manok ve ekmekçi esnâfı nizâm ustalarından Kadıyoran fırını ustası Bogos v. Saganil’den her biri meclis-i ma‘kūd-ı mezkûrda mûmâ-ileyhâ Zeliha Hanım mahzarında medyûn-ı merkūm Hazar hâzır olduğu hâlde her biri ikrâr-ı tâm ve takrîr-i kelâm edip mukırr-ı medyûn-ı hâzır-ı merkūm Hazar’ın mûmâ-ileyhâ Zeliha Hanım’a zimmetinde edâsı vâcib deyni olan meblağ-ı mecmû‘-ı mezkûr kırk yedi bin yüz yirmi beş guruşa biz dahi tarafeynden bi’l-emr ve’l-kabûl kefâlet-i mutlaka-i sahîha-i şer‘iyye ile başka, başka kefîl ve zâminler olup ve min ciheti’l-kefâleti’l-mezkûre her birimiz âharın zimmetine lâzım gelen meblağa dahi kezâlik tarafeynden bi’l-emr ve’l-kabûl kefâlet-i mutlaka-i sahîha-i şer‘iyye ile kefîl ve zâminiz dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî Gurre-i Zilka‘de sene 1278 Şuhûdü’l-hâl: Muhzır Süleyman Ağa b. ( ), Muhzır Mustafa Ağa b. Muhzır el-Hâc Yusuf Ağa b. ( ), Muhzır Feyzullah Ağa b. ( ), ve gayruhum