İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 88 Hüküm no: 35 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kudüs’te ölen Yahudi tüccarı Sabetay v. Yasef’in mirasçılarına kalan mahzenin Rumeli Ordusu erkânından Ferik Ali Paşa’ya satılması Mahzen mübâya‘ası 28133 guruş Kudüs-i Şerîf’de sâkin iken bundan mukaddem fevt olan teba‘a-i Devlet-i aliyye’nin Yahudi milletinden ve tüccârdan Sabetay v. Yasef’in sulbî kebîr oğulları ve hasren vârisleri olduğu ber-nehc -i şer‘î mütehakkık olan teba‘a-i Devlet-i aliyye’nin Yahudi milletinden Havâss-ı Refî‘a kazâsına muzâfe kasaba-i Hasköy’de sâkinler tüccârdan Yasef ve Avram meclis-i şer‘-i şerîf-i hatîrde Rumeli Ordu-yı Hümâyûnu erkânından ve ferîkân-ı kirâmdan bâ‘isü’l-kitâb sa‘âdetlü Ali Paşa hazretleri b. el-Hâc Osman Ağa’nın sulbî kebîr mahdûmu tarafından husûs-ı âti’l-beyânda tasdîka vekîl-i şer‘îsi yâver-i harb yüzbaşılarından Hüseyin Kadri Bey mahzarında her biri bi’l-verâse ikrâr-ı tâm ve takrîr-i kelâm edip İstanbul’da Kazgancılar kurbünde İbrahim Paşa mahallesinde vâki‘ arsası Çelebioğlu mahallesinde imâm olanlara senevî yüz yirmi akçe mukāta‘-i kadîmelü ma‘lûmu’l-hudûd ve’l-müştemilât bir bâb mülk mahzen babamız müteveffâ-yı merkūm Sabetay’ın hayâtında yedinde olup bin iki yüz altmış sekiz senesi şehr-i Ramazani’l-mübâreki’nin yirmi birinci günü târihiyle müverraha ve ol târihde mahmiye-i mezkûrede vâki‘ Ahi Çelebi mahkemesi nâibi olan Şehrî Hâfız Efendizâde faziletlü es-Seyyid Mehmed Esad Efendi hazretlerinin imzâ ve hatemini hâviye işbu bir kıt‘a mübâya‘a hücceti nâtıka olduğu üzere ile’l-fevt yedinde müstakillen mülk ve hakkı ve ba‘de fevtihî ancak bize mevrûs olup ol vechile mahzen-i mezkûr ber-minvâl-i muharrer yedimizde irsen mülkümüz olduğunu nâtık millet-i mezkûre Hahambaşısı tarafından dahi yedimize işbu bir kıt‘a ilmühaber verilmekle biz âti’z-zikrin sudûruna değin ber-minvâl-i muharrer irsen mâlik olduğumuz mahzenden mezkûru bi’l-cümleti mâ yeştemiluhu ve yahvihi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile yirmi sekiz bin sekiz yüz otuz üç guruşa müvekkil-i müşârün-ileyh Ali Paşa hazretlerine bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm yirmi sekiz bin sekiz yüz otuz üç guruşu tamamen bize def‘ u teslîm biz dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik fîmâ-ba’d mahzen-i mezkûrde bizim aslâ ve kat‘â alâka ve medhalimiz kalmayıp müvekkil-i müşârün-ileyh Ali Paşa hazretlerinin mülk-i müşterâsı ve hakk-ı sırfı olmuşdur dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 8 Zilka‘de sene 1278 Şuhûdü’l-hâl: Muhzır Feyzullah Ağa b. ( ), Muhzır el-Hâc Salih Ağa b. ( ), Muhzır Ahmed Ağa b. ( ), Mekteb-i Harbiye-i Şâhâneden muhrec Mihaliçli Mülâzım Ömer Efendi b. Ali, Dellâl Buhur v. Nesim Yahudi, Dellâl Avram v. İsak Yahudi, bâyi‘-i merkūmYasef’in sulbî kebîr oğlu Sabetay Yahudi, ve gayruhum.