Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 522 Hüküm no: 628 Orijinal metin no: [109a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman b. Bayram’ın menzil hissesini Saliha bt. Abdullah’a satması Mahmiye-i İstanbul’da Sultan Selim Hân -aleyhi’r-rahmetü ve’l-gufrân- Câmi‘-i şerîfi kurbunda vâki‘ Çukurbostan mahallesinde sâkin Süleyman b. Bayram nâm kimesne meclis-i şer‘-i şerîf-i enverde zevce-i metrûkesi bâ‘isetü’l-kitâb Sâliha bt. Abdullah nâm hâtun mahzarında bi tav‘ihî ikrâr ve takrîr-i kelâm edip arsasının Sivasîzâde zâviyesine ayda on akçe mukāta‘ası olup ve binâsı mülk ve hakkım olan mahalle-i mezbûrede vâki‘ bir tarafdan el-Hâc Süleyman mülkü ve bir tarafdan İbrahim Çelebi mülkü ve bir tarafdan es-Seyyid Osman Çelebi mülkü ve bir tarafdan tarîk-i âm ile mahdûd bir bâb tahtânî oda ve bir sofa ve havlu ve kenîfi müştemil mülk menzilimin üç sehimden iki sehmini cümle tevâbi‘ ve levâhıkı ile zevcem mezbûre Sâliha Hâtun’a tarafeynden îcâb ve kabûlü hâvî bey‘-i kat‘î ile elli esedî guruşa bey‘ ve teslîm ol dahi ber vech-i muharrer iştirâ ve kabz ve tesellüm eylediğinden sonra semeni olan meblağ-ı mezbûr elli guruşu yedinden tamâmen ahz u kabz eyledim ba‘de’l-yevm menzil-i mahdûd-ı mezkûrûn iki sehimi mezbûre Sâliha Hâtun’un mülk-i müşterâsı olmuşdur keyfe mâ yeşâ ve yahtâr mutasarrıfe olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Hüseyin Çelebi, uncu Mustafa Çelebi, Mehmed Çelebi b. Ahmed, Abdurrahman b. Hüseyin, İbrahim [b.] Ahmed, el-Hâc Abdi b. Mustafa, Hüseyin [b.] Mustafa.