İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 91 Hüküm no: 37 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ketebeden Mehmed Galib Efendi’nin tütüncü dükkânını alay imâmı el-Hâc Mehmed Efendi b. Mustafa’ya satması Tütüncü mübâya‘ası 4000 guruş Kezâlik mahmiye-i İstanbul’da Yenibahçe kurbünde Defterdâr Ahmed Çelebi mahallesinde sâkin ketebeden Mehmed Galib Efendi b. Mehmed Emin meclis-i şer‘-i şerîf-i lâzımü’t-teşrîfde Dersaâdet Ordu-yı Hümâyûnu piyâde beşinci alayının alay imâmı olup mahmiye-i mezkûrede Zeyrek kurbünde Şah Hubân mahallesinde sâkin işbu bâ‘isü’l-vesîka el-Hâc Mehmed Efendi b. Mustafa muvâcehesinde tütüncü esnâfı kethüdâsı el-Hâc Abdüllatif Efendi ile on nefer müslim ve beş nefer hıristiyan lonca ihtiyârları taraflarından mürsel kethüdâ vekîli Ahmed Efendi b. Osman hâzır olduğu hâlde ikrâr-ı tâm ve takrîr-i kelâm edip mahmiye-i mezbûrede Lütfi Paşa mahallesinde vâki‘ bir tarafdan simidçi fırını ve bir taraftan berber dükkânı ve bir tarafdan bahçe ve taraf-ı râbi‘i tarîk-i âm ile mahdûd merhûme Şah Sultan Vakfı müsakkafâtından olan bir bâb tütüncü dükkânı benim bâ-temessük-i mütevelli bi’l-icâreteyn müstakillen taht-ı tasarrufumda ve derûnunda mevcûde Eshâm Muhâsebesi Kaleminde el-Hâc Ahmed Ağa ismine mukayyed ve mu‘teber beyne’l-esnâf gedik ta‘bîr olunur şehriye iki buçuk guruş kirâ-yı kadîmelü bâ-defter-i müfredât âlât-ı lâzime-i ma‘lûmeden akd-i âti’z-zikrin sudûruna değin yedimde olup bin iki yüz yetmiş beş senesi şehr-i Rebî‘ülahirinin sekizinci günü târihiyle müverraha ve ol târihde Dârü’l-hilâfeti’l-aliyye kādısı olup hâlâ Anadolu pâye-i celîlesiyle mübeccel semâhatlü es-Seyyid Mustafa Asım Efendi hazretlerinin imzâ ve hatemini hâviye işbu bir kıt‘a mübâya‘a hücceti nâtıka olduğu üzere müstakillen yedimde mülk ve hakkım olup hattâ âlât-ı gedik-i mezkûr müstakillen yedimde mülküm olduğunu nâtık esnâf-ı merkūme kethüdâsı mûmâ-ileyh el-Hâc Abdüllatif Efendi dahi işbu bir kıt‘a memhûr ilmühaberi yedime i‘tâ etmekle el-hâletü hâzihi ben ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mûmâ-ileyh el-Hâc Mehmed Efendi’ye dört bin guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl edip semeni olan meblağ-ı mezkûr dört bin guruşu bana tamâmen def‘ u teslîm eylediğinde ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-minvâl-i muharrer âharın ibrâsını kabûl eyledik, ba‘de’l-yevm âlât-ı gedik-i mezkûrde benim aslâ ve kat‘â alâka ve medhalim kalmayıp mûmâ-ileyh el-Hâc Mehmed Efendi’nin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 21 Zilhicce sene 1278 Şuhûdü’l-hâl: Şâhidûn es-sâbıkūn