İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 92 Hüküm no: 38 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayserili mânifatura tüccârından Papasoğlu Haralambus v. Sarafim’in sahip olduğu arsayı İstefani v. Ciyotaki’ye satması Arsa mübâya‘ası 20000 guruş Vilâyet-i Anadolu’da Kayseriye kazâsına tâbi‘ Gerir? karyesi ahâlisinden olup mahmiye-i İstanbul’da Çarşı-yı Kebîr’de vâki‘ Kilid hânında sâkin teba‘a-i Devlet-i aliyye’nin Rum milletinden ve mânifatura tüccârından Papasoğlu Haralambus v. Sarafim meclis-i şer‘-i hatîrde mahrûse-i Galata hâricinde Beyoğlu nâm mahalde sâkin teba‘a-i Devlet-i aliyye’den olup Eflaklı olduğu Memleketeyn kapı kethüdâsı tarafından vurûd eden işbu bir kıt‘a ilmühaber meâlinden müstebân olan işbu hâmilü’r-rakīm İstefani v. Ciyotaki muvâcehesinde ikrâr-ı tâm ve takrîr-i kelâm edip mahmiye-i merkūme hısnı ebvâbından Eğrikapı dâhilinde Tekfur sarayı kurbünde Çakır Ağa mahallesinde vâki‘ etrâf-ı erba‘ası el-Hâc Ahmed Ağa menzilleri ve Yahudhâne ve tarîk-i âm ile mahdûd terbî‘an bin zirâ‘ bir bâb mühterik mülk menzil arsasının tarîk-i âm cânibinde vâki‘ bir aded bi’r-i mâyı müştemil olarak mukaddemâ alâmet-i fâsıla vaz‘ıyla mümtâz ve tahdîd olunmuş olan terbî‘an üç yüz otuz üç zirâ‘mu‘ayyen mahal teba‘a-i Devlet-i aliyye’den gāib ani’l-meclis Eşkinoz’un ve mâ‘adâ altı yüz altmış yedi zirâ‘ mahall-i mu‘ayyeni derûn unda müştemilât-ı ma‘lûme ve eşcâr-ı magrûse-i mütenevvi‘a ve taş duvar ile muhât olarak yedimde olup bin iki yüz yetmiş üç senesi Muharremü’l-harâmının yirmi beşinci günü târihiyle müverraha ol târihde Dârü’l-hilâfeti’l-aliyye kādısı olan Osman Efendizâde Mehmed Emin Efendi merhûmun imzâ ve hatemini hâviye işbu bir kıt‘a mübâya‘a hücceti mantûkunca akd-i âti’z-zikrin sudûruna değin yedimde mülk ve hakkım olmağla el-hâletü hâzihi ben ber-minvâl-i muharrer mâlik olduğum ma‘a müştemilât-ı ma‘lûme sâlifü’l-beyân altı yüz altmış yedi zirâ‘ arsa-i mahdûde-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm İstefani’ye yirmi bin guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl edip sonra semeni olan meblağ-ı mezkûr yirmi bin guruşu bana tamamen def‘ u teslîm eylediğinde ben dahi yedinden tamâmen ve kâmilen ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-minvâl-i muharrer âharın ibrâsını kabûl eyledik, ba‘de’l-yevm müştemilâtıyla mârru’z-zikr altı yüz altmış yedi zirâ‘ arsa-i müfreze-i mahdûde-i mezkûrede benim aslâ ve kat‘â alâka ve medhalim kalmayıp merkūm İstefani’nin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 5 Zilhicce sene 1278 Şuhûdü’l-hâl: Muhzır Süleyman Ağa b. ( ), Muhzır Mustafa Ağa b. ( ), Muhzır Ahmed Ağa b. ( ), Muhzır Feyzullah Ağa b. ( ), ve gayruhum