İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 93 Hüküm no: 39 Orijinal metin no: [8b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnâfından Yanko v. Asteryo’nun aldığı borcu ödediği ve bakkal dükkanını rehinden kurtardığı Bakkal mübâya‘ası fekk-i rehin 40000 guruş Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen teba‘a-i Devlet-i aliyye’nin Rum milletinden ve sarrâf tâifesinden Kayseriyeli Kulaksızoğlu Haci Agop v. Azer meclis-i şer‘-i şerîf-i hatîrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan bakkal esnâfından bâ‘isü’r-rakīm Yanko v. Asteryo muvâcehesinde esnâf-ı mezkûrenin kethüdâsı Ahmed Efendi tarafından mürsel esnâf-ı merkūme çavuşu teba‘a-i Devlet-i aliyye’den Sava v. Vasil ve her biri teba‘a-i Devlet-i aliyye’den ve esnâf-ı mezkûreden Simyon v. Petro ve Sarrâf Abraham v. Agop hâzır oldukları hâlde ikrâr-ı tâm ve takrîr-i kelâm edip mahmiye-i İstanbul hısnı ebvâbından Balat kapısı dâhilinde vâki‘ bir tarafdan Mustafa Ağa dükkânı ve bir tarafdan Şekerci Ali Ağa dükkânı ve bir tarafdan Aşçı Anaştaş dükkânı ve taraf-ı râbi‘i tarîk-i âm ile mahdûd mahmiye-i mezkûrede vâki‘ Ayasofya-i Kebîr Câmi’-i şerîfi evkāfı müsakkafâtından merkūm Yanko’nun bi’l-icâreteyn taht-ı tasarrufunda olan şehriye on beş guruş kirâ-yı kadîmelü Osman Ağa dükkânı demekle arîf bir bâb bakkal dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme merkūm Yanko’nun bâ-hüccet yedinde müstakillen mülkü iken merkūm Yanko ber-minvâl-i muharrer mâlik olduğu âlât-ı gedik-i mezkûru be-safka-i vâhide yedimde olup işbu meclis-i şer‘-i şerîfde bi’l-ibrâz kırâ’at olunan mahmiye-i İstanbul [9a] Bab mahkemesi nâibi sâbık müderrisîn-i kirâmdan mekremetlü Harputî es-Seyyid Mustafa Faik Efendi’nin imzâ ve hatemini hâviye işbu bir kıt‘a mübâya‘a hücceti mantûkunca sûret kat‘îde kırk bin guruş semen-i medfû‘ ve makbûza bey‘ ve teslîm ben dahi ber-vech-i muharrer iştirâ ve tesellüm ve kabz u kabûl edip lâkin bey‘-i mezkûr hakīkatda bey‘ olmayıp semen-i mezkûr kırk bin guruş cihet-i karzdan bana deyn ve mukābelesinde âlât-ı gedik-i mezkûru rehin olmağla el-hâletü hâzihi merkūm Yanko meblağ[-ı mezkûr] kırk bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz ve âlât-ı gedik-i mezkûru rehinden fek ve merkūm Yanko’ya teslîm eylediğimde ol dahi ber-vech-i muharrer yedimden ahz u kabz edip fîmâ-ba’d âlât-ı gedik-i mezkûrdan benim kat‘an hakkım kalmayıp merkūm Yanko’nun kel-evvel mülküdür dedikde gıbbe. Fî 8 Şevval sene 1278 Şuhûdü’l-hâl: Muhzır Şakir Ağa b. ( ), Muhzır Süleyman Ağa b. ( ), Muhzır el-Hâc Yusuf Ağa b. ( ), Muhzır Feyzullah Ağa b. ( ), ve gayruhum