İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 94 Hüküm no: 40 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasâb Tanaş zevcesi Anasto bt. Kostandi’nin sahip olduğu şerbethâne hisselerini Eflaklı tâifesinden Eleniko bt. Kostandi’ye satması Şerbethâne mübâya‘ası 30000 guruş,. Kaydı ihrâc şüd fî 13 Ra sene 309 Kezâlik medîne-i Üsküdar’a muzâfe Kuzguncuk karyesinde sâkine teba‘a-i Devlet-i aliyye’nin Rum milleti nisvânından Kasâb Tanaş zevcesi demekle meşhûre şahsı ta‘rîf-i şer‘î ile mu‘arrefe olan Anasto bt. Kostandi meclis-i şer‘-i şerîf-i hatîrde mahrûse-i Galata hâricinde Beyoğlu civârında Aynalı Çeşme nâm mahalde sâkine tüccârdan müteveffâ Haci Tohari v. Yani zevcesi demekle ma‘rufe teba‘a-i Devlet-i aliyye’nin Eflaklı tâifesi nisvânından olduğu bâ-ilmühaber mütehakkık olan bâ‘isetü’r-rakīm Eleniko bt. Kostandi’nin sadrî kebîr oğlu ve tarafından husûs-ı âti’z-zikrde tasdîka vekîl-i şer‘îsi teba‘a-i Devlet-i aliyye’den tüccârdan Panayot v. el-merkūm Haci Tohari muvâcehesinde Âsitâne-i aliyye ve bilâd-ı selâsede vâki‘ şerbethâneci esnâfının ustabaşılarından ve her biri teba‘a-i Devlet-i aliyye’den Çarşı kolu ustası Bunyad v. Pretomos ve Kandilli şerbethânesi ustası Haci Braşkova v. Haci Pretomos ve Kadı karyeli şerbethâneci Yanko v. Yorgi ve Sa‘lebci sokağı şerbethânesi ustası Yuvakim v. Hacı İstefan hâzır oldukları hâlde ikrâr-ı tâm ve takrîr-i kelâm edip medîne-i mezkûreye muzâfe Kādı karyesinde Cafer Ağa mahallesinde Ermeni kenisesi karşısında Köprübaşı nâm mahalde vâki‘ bir tarafdan Markaki mağazası ve bir tarafdan müvekkile-i merkūme Eleniko’nun arsası ve ba‘zen Çalıoğlu Andonaki menzili ve tarafeyni tarîk-i âm ile mahdûd li-ebeveyn er karındaşım Kasâb Kostanti’nin taht-ı tasarrufunda olan şehriye on beş guruş kirâlı fıskıyeli nâm-ı diğer Eftim şerbethânesi demekle arîf bir bâb vakıf şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla seksen altı sehm iki pul ve sülüsân pul hisse-i şâyi‘ası âharların yedlerinde mülkleri olup mâ‘adâ otuz üç sehm bir pûl ve sülüs pûl hisse-i şâyi‘ası yedimde olup bin iki yüz yetmiş dört senesi Şevvali’l-mükerreminin on birinci günü târihiyle müverrah ve ol târihde rüsûm-i zecriye muhassılı olan sa‘âdetlü Rüstem Paşa’nın mührüyle memhûr işbu bir kıt‘a sûret ve hâlâ rüsûm-i zecriye nâzırı izzetlü Hüseyin Ağa’nın memhûr bir kıt‘a ilmühaberi nâtık oldukları üzere akd-i âti’z-zikrin sudûruna değin yedimde mülk ve hakkım olmağın ben âlât-ı gedik-i mezkûrdan ber-minvâl-i muharrer mâlike olduğum otuz üç sehm bir pûl ve sülüs pûl hisse-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ otuz bin guruşa müvekkile-i merkūme Eleniko’ya bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm otuz bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm otuz üç sehm bir pûl ve sülüs pûl hisse-i şâyi‘a-i âlât-ı gedik-i mezkûrda benim aslâ ve kat‘â alâka ve medhalim kalmayıp müvekkile-i merkūme Eleniko’nun mülk-i müşterâsı ve hakk-ı sırfı olmuşdur dedikde gıbbe. Fî 27 Şevval sene 1278 Şuhûdü’l-hâl: Muhzır Süleyman Ağa b. ( ), Muhzır Şakir Ağa b. ( ), Muhzır el-Hâc Salih Ağa b. ( ), Muhzır Feyzullah Ağa b. ( ), ve gayruhum