İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 95 Hüküm no: 41 Orijinal metin no: [9a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Loksi ve Ezmerağda kardeşlerin sahip oldukları şerbethâne hisselerini Tanaş v. Bahçıvan Yorgi’ye satmaları Şerbethâne mübâya‘ası 4000 guruş Kezâlik mahrûse-i Galata’ya muzâfe İstinye nâhiyesine tâbi‘ Tarabya karyesinde sâkine teba‘a-i Devlet-i aliyye’nin Rum milleti nisvânından şahısları ta‘rîf-i şer‘î ile mu‘arrefeler olan Loksi ve Ezmerağda bintey Petro lisân tercümânı teba‘a-i Devlet-i aliyye’nin Rum milletinden ve şerbethâneci esnâfının karye-i mezkûre kolu ustabaşısı Vasil v. Nikola hâzır olduğu hâlde meclis-i şer‘-i şerîf-i hatîrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan bâ‘isü’r-rakīm Tanaş’ın babası ve tarafından husûs-ı âti’l-beyânda tasdîka vekîl-i şer‘îsi teba‘a-i Devlet-i aliyye’nin Rum milletinden Bahçıvan Yorgi v. Hıristo muvâcehesinde her biri teba‘a-i Devlet-i aliyye’nin Rum milletinden ve esnâf-ı merkūmenin Beyoğlu kolu ustabaşısı Dülbendcioğlu Andon v. Ohannes ve çavuşu Bodos v. Kostandi hâzır oldukları hâlde her biri ikrâr-ı tâm ve takrîr-i kelâm edip zikr olunan Tarabya karyesinde Çarşıiçi nâm mahalde Karakolhâne karşı tarafında bakkal dükkânı ittisâlinde vâki‘ bir tarafdan Ziko’nun bakkal dükkânı ve bir tarafdan Ezmerağda bt. Yorgi’nin menzili ve tarafeyni tarîk-i âm ile mahdûd Kosti ve Tarsi ve Kiryakiçe’nin yedlerinde mülkleri olan şehriye otuz guruş kirâlı Ekmekçi Petro şerbethânesi demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla yüz dört sehm hisse-i şâyi‘aları âharların yedlerinde mülkleri olup mâ‘adâ sekiz sehimden on altı sehm hisse-i şâyi‘ası akd-i âti’z-zikrin sudûruna değin yedimizde olup bin iki yüz altmış beş senesi şehr-i Rebî‘ülâhiri’nin onuncu günü târihiyle müverrahlar ve ol târihde rüsûm-i zecriye muhassılı olan es-Seyyid Yakub Paşa’nın mührüyle memhûrlar işbu iki kıt‘a sûret ve hâlâ Zecriye Nâzırı izzetlü Hüseyin Ağa’nın bir kıt‘a ilmühaberi mantûklarınca yedimizde münâsefeten mülk hakkımız olmağla biz âlât-ı gedik-i mezkûrdan ber-minvâl-i muharrer mâlike olduğumuz on altı sehm hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ müvekkil-i merkūm Tanaş’a dört bin guruşa bey‘ ve temlîk ve vech-i lâyıkıyla teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm dört bin guruşu tamâmen bize def‘ u teslîm biz dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı mezkûrun on altı sehm hisse-i şâyi‘a-i mezkûresinde bizim aslâ ve kat‘â alâka ve medhalimiz kalmayıp müvekkil-i merkūm Tanaş’ın mülk-i müşterâsı ve hakk-ı sırfı olmuşdur dediklerinde gıbbe. Fî 11 Muharrem sene 1279 Şuhûdü’l-hâl: Muhzır Şakir Ağa b. ( ), Muhzır Süleyman Ağa b. ( ), Muhzır Mustafa Ağa b. ( ), Muhzır el-Hâc Salih Ağa b. ( ), ve gayruhum