İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 96 Hüküm no: 42 Orijinal metin no: [9a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtımatü’z-zehrâ Hanım’ın vefât eden eşinden miras kalan tütüncü dükkânındaki hisselerini oğlu Seyyid Ahmed Efendi’ye satması Tütüncü mübâya‘ası, Tahtakale kurbünde Çiçekçibaşı Hanı civârında tütüncü mübâya‘ası 6250 guruş Âsitâne-i sa‘âdet-âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gedikleriyle gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen mahmiye-i İstanbul hısnı ebvâbından Odunkapısı dâhilinde Hoca Hamza mahallesi ahâlisinden iken bundan mukaddem edâ-i farîza-i hacc-ı şerîf için cânib-i Hicaz-ı mağfiret-tırâza azîmet ve Mekke-i mükerreme alâ fâtihahâ efdalü’t-tahiyyede kable’l-hac vefât eden Tönbekici es-Seyyid Mehmed Tahir Ağa b. es-Seyyid el-Hâc Ahmed bin Abdullah’ın verâseti zevce-i menkûha-i metrûkesi mahalle-i mezkûrede sâkine Fâtımatüzzehra Hanım bt. Abdüllatif ile sulbî kebîr oğlu Tönbekici es-Seyyid Ahmed Efendi ve sulbiye-i kebîre kızları Şerife Emine Behiye Hanım ve Şerife Emine Hürmüz Hanım’a münhasıra ve tashîh-i mes’ele-i mirâsları otuz iki sehimden olup sihâm-ı mezkûreden dört sehmi mezbûre Fâtımatü’z-zehra Hanım’a ve on dört sehmi mezbûr es-Seyyid Ahmed Efendi’ye ve yedişer sehimden on dört sehmi dahi mezbûretân Şerife Emine Behiye Hanım ve Şerife Emine Hürmüz Hanım’a isâbeti tahakkukundan sonra zâtı ta‘rîf-i şer‘î ile mu‘arrefe olan zevce-i mezbûre Fâtımatüzzehra Hanım meclis-i şer‘-i şerîf-i münîrde bâ‘isü’l-kitâb mezbûr es-Seyyid Ahmed Efendi mahzarında tütüncü esnâfının kethüdası el-Hâc Mehmed Latif Efendi b. Ahmed ile duhân tüccârından mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel vekîlleri kethüdâ vekîli Ahmed Efendi b. Osman hâzır olduğu hâlde ikrâr-ı tâm ve takrîr-i kelâm edip [9b] mahmiye-i mezkûrede Tahtakale kurbünde Çiçekçibaşı Hânı civârında leblebici ve kuru kahveci dükkânları beynlerinde kâin merhûm Emin Nureddin Vakfı müsakkafâtından benimle mezbûrûn es-Seyyid Ahmed Efendi ve Şerife Behiye Hanım ve Şerife Emine Hürmüz Hanım’ın bi’l-icâreteyn taht-ı tasarrufumuzda olan şehriye beş guruş kirâlı Eshâm Muhâsebesi kaleminde es-Seyyid Ömer Ağa b. Osman ismine mukayyed iki kepenkli bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme zevcim ve mûrisimiz müteveffâ-yı mezbûr es-Seyyid Mehmed Tahir Ağa’nın hayâtında ile’l-fevt yedimde olup bin iki yüz elli iki senesi Zilka‘deti’ş-şerîfesinin onuncu günü tarihiyle müverraha ve ol târihde Dârü’l-hilâfeti’l-aliyye kādısı olan Reîsü’l-küttâb Arif Efendizâde Mehmed Raif Beyefendi merhûmun imzâ ve hatemini hâviye bir kıt‘a hüccet-i şer‘iyye ve bin iki yüz elli üç senesi Muharremü’l-harâmının yirmi altıncı günü tarihiyle müverraha ve ol târihde Dârü’s-saltanati’s-seniyye kādısı olan Keçecizâde Abdülhalim Efendi merhûmun kezâlik imzâ ve hatemini hâviye bir kıt‘a hâmiş-i hüccet-i şer‘iyye ve kethüdâ-yı mezbûrun takdîm eylediği bir kıt‘a ilmühaber mantûklarınca yedinde müstakillen mülk ve hakkı ve ba‘de vefâtihî benimle mezbûr es-Seyyid Ahmed Efendi ve mezbûretân Şerife Emine Behiye ve Şerife Emine Hürmüz Hanım’a ber tashîh-i merkūm mevrûs olmağla ben âlât-ı gedik-i mezkûrdan ber-minvâl-i muharrer mâlike olduğum dört sehm hisse-i şâyi‘amı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şerîketân-ı merkūmetân altı bin iki yüz elli guruşa oğlum mezbûr es-Seyyid Ahmed Efendi’ye bey‘ ve temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm altı bin iki yüz elli guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı mezkûrun ber tashîh-i merkūm dört sehm hisse-i şâyi‘a-i merkūmesinde benim aslâ ve kat‘â alâka ve medhalim kalmayıp âlât-ı gedik mezkûrun on dört sehm hisse-i şâyi‘ası mukaddemen irsen ve dört sehm hisse-i şâyi‘ası dahi hâlâ şirâen ki cem‘an on sekiz sehm hisse-i şâyi‘ası merkūm es-Seyyid Ahmed Efendi’nin mülk-i mahzı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 4 Muharrem sene 1279 Şuhûdü’l-hâl: Muhzır Süleyman Ağa b. ( ), Muhzır Mustafa Ağa b. ( ), Muhzır Mehmed Ağa b. ( ), Muhzır Feyzullah Ağa b. ( ), ve gayruhum