İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 98 Hüküm no: 43 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtımatü’z-zehrâ Hanım’ın vefât eden eşinden kendisine miras kalan diğer kârgîr tütüncü dükkânındaki hisselerini oğlu Seyyid Ahmed Efendi’ye satması Kârgîr tütüncü 6250 guruş Kezâlik mahmiye-i İstanbul hısnı ebvâbından Odun kapısı dâhilinde Hoca Hamza mahallesi ahâlisinden iken bundan akdem edâ-i farîza-i hacc-ı şerîf için cânib-i Hicaz-ı mağfiret-tırâza azîmet ve Mekke-i mükerreme alâ fâtihihâ efdalü’t-tahiyyede kable’l-hâc vefât eden Tönbekici es-Seyyid Mehmed Tahir Ağa b. es-Seyyid el-Hâc Ahmed bin Abdullah’ın verâseti zevce-i menkûha-i metrûkesi mahalle-i mezkûrede sâkine Fâtımatü’z-zehra Hanım bt. Abdüllatif ile sulbî kebîr oğlu Tönbekici es-Seyyid Ahmed Efendi ve sulbiye-i kebîre kızları Şerife Emine Behiye Hanım ve Şerife Emine Hürmüz Hanım’a münhasıra ve tashîh-i mesele-i mîrâsları otuz iki sehimden olup sihâm-ı mezkûreden dört sehmi mezbûre Fâtımatü’z-zehrâ Hanım’a ve on dört sehmi mezbûr Ahmed Efendi’ye ve yedişer sehimden on dört sehmi dahi mezbûretân Şerife Emine Behiye Hanım ve Şerife Emine Hürmüz Hanım’a isâbeti tahakkukundan sonra zâtı ta‘rîf-i şer‘î ile mu‘arrefe olan zevce-i mezbûre Fâtımatü’z-zehraHanım meclis-i şer‘-i şerîf-i münîrde bâ‘isü’l-kitâb mezbûr es-Seyyid Ahmed Efendi mahzarında tütüncü esnâfının kethüdası el-Hâc Mehmed Latif Efendi b. Ahmed ile duhân tüccârından mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel vekîlleri kethüdâ vekîli Ahmed Efendi b. Osman hâzır olduğu hâlde ikrâr-ı tâm ve takrîr-i kelâm edip mahmiye-i mezkûrede Tahtakale civârında Sulu Hân tahtında İpçi ve İpekçi dükkânları beynlerinde kâin merhûm Çakır Ağa Vakfı müsakkafâtından Ihlamurcu Emin Efendi’nin taht-ı tasarrufunda olan şehriye dört kuruş kirâ-yı kadîmelü Eshâm Muhâsebesi kaleminde Giridî el-Hâc İsmail Ağa ismine mukayyed iki kepenk bir bâb kârgîr tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme zevcim ve mûrisimiz müteveffâ-yı mezbûr es-Seyyid Mehmed Tahir Ağa’nın hayâtında ile’l-vefât yedimde olup bin iki yüz elli üç senesi Saferü’l-hayrı’nın on üçüncü günü tarihiyle müverraha ve ol târihde Evkāf-ı hümâyûn müfettişi olan sudûr-ı izâmdan Ahmed Şükrü Efendi merhûmun imzâ ve hateminihâviye işbu bir kıt‘a hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedinde müstakillen mülk ve hakkı ve ba‘de vefâtihî benimle mezbûrûn es-Seyyid Ahmed Efendi ve Şerife Emine Behiye ve Şerife Emine Hürmüz Hanım’a ber tashîh-i mezkūr mevrûs olmağla ben âlât-ı gedik-i mezkûrdan ber-minvâl-i muharrer mâlike olduğum dört sehm hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şerîketân-ı mezbûretâna altı bin iki yüz elli guruşa mezbûr es-Seyyid Ahmed Efendi’ye bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm altı bin iki yüz elli guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz ber-minvâl-i muharrer âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrun ber tashîh-i merkūm dört sehm hisse-i şâyi‘asında benim aslâ ve kat‘â alâka ve medhalim kalmayıp âlât-ı gedik-i mezkûrun on dört sehm hisse-i şâyi‘ası mukaddemâ irsen ve dört sehm hisse-i şâyi‘ası dahi hâlâ şirâen ki cem‘an on sekiz sehm hisse-i şâyi‘ası mezbûr es-Seyyid Ahmed Efendi’nin mülk-i mahzı ve hakk-ı sırfı olmuşdur dedikde gıbbe. Fî 4 Muharrem sene 1278 Şuhûdü’l-hâl: Şâhidûn es-sâbıkūn