İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 100 Hüküm no: 44 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fehime Hanım bt. Abdullah’ın boşandığı eşinin iki çocuğunun her biri için aylık 200 kuruş nafaka bağlattırması Nafaka-i sagīr 200 guruş Mahmiye-i İstanbul’da Hoca Paşa mahallesinde sakine zâtı ta‘rîf-i şer‘î ile mu‘arrefe olan işbu bâ‘isetü’l-kitâb Fehime Hanım bt. Abdullah meclis-i şer‘-i şerîf-i lâzımü’t-teşrîfde zevc-i mutallıkı Bağdat Evkāf Müdürü sâbık izzetlü Osman Bey b. İbrahim Paşa mahzarında ikrâr-ı tâm ve ta‘bîr ani’l-merâm edip mûmâ-ileyh Osman Bey ile mukaddemâ zevciyet beynimizde kāime iken mûmâ-ileyhin firâşından hâsıllar ve benden mütevellidler ve bi-hakkı’l-hıdâne hâlâ hacr ve terbiyemde olan sulbî oğulları tahmînen iki yaşında Mehmed Necib ve tahmînen üç aylık Mehmed Rüşdü nâm sagīrlerin aslâ mâlları olmayıp nafaka ve kisveye eşedd-i ihtiyâc ile muhtâclar olmalarıyla sagīran-ı mezbûrânın nafaka ve kisve ve sâir levâzım-ı zarûriyeleri için pederleri mûmâ-ileyh Osman Bey üzerine kıbel-i şer‘den kadr-ı ma‘rûf meblağ farz ve takdîr buyurulmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i hâsim-i vâlâ-cenâbi’l-muvakkı‘ ismuhu fî sadri’l-kitâb tûbâ lehû ve hüsnü me’âb efendi hazretleri dahi sagīrân-ı mezbûrânın nafaka ve kisve ve sâir levâzım-ı zarûriyeleri için pederleri mûmâ-ileyh Osman Bey üzerine işbu târih-i kitâbdan i‘tibâren bi’t-terâzi beherine şehriye ikişer yüz guruşdan cem‘an dört yüz guruş nafaka farz ve takdîr buyurup meblağ-ı mefrûz-ı mezkûr beher şehr dörder yüz guruşu sagīrân-ı mezbûrânın nafaka ve kisve ve sâir levâzım-ı zarûriyelerine harc u sarfa ve lede’l-iktizâ istidâneye ve inde’z-zafer pederleri mûmâ-ileyh Osman Bey üzerine rucû‘a vâlidesi ve hâdinesi mezbûre Fehime Hanım’a izin vermeğin mâ-vaka‘a bi’t-taleb ketb olundu. Fî 23 Zilhicce sene 1278 Şuhûdü’l-hâl: Muhzır Yusuf Ağa b. ( ), Muhzır Feyzi Ağa b. ( ), Muhzır Mustafa Ağa b. ( ), Muhzır Salih Ağa b. ( ), ve gayruhum