İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 100 Hüküm no: 45 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Emine Hanım bt. Feyzullah’ın boşandığı eşinden çocuğu için aylık 60 kuruş nafaka bağlattırması Nafaka-i sagīr 60 guruş Mahmiye-i İstanbul’da vâki‘ Sultan Ahmed Hân-ı Gāzi aleyhi-rahmetü rabbi’l-bârî hazretleri Câmi’-i şerîfi civârında Nahılbend mahallesinde sâkine zâtı ta‘rîf-i şer‘î ile mu‘arrefe olan Şerife Emine Hanım bt. Feyzullah meclis-i şer‘-i şerîf-i lâzımü’t-teşrîfde zevc-i sâbıkı mahrûse-i Galata’ya muzâfe kasaba-i Tophane’de Cihangir mahallesinde sakin Pirinççi Mehmed Efendi b. Osman mahzarında takrîr-i kelâm ve ta‘bîr ani’l-merâm edip mezbûr Mehmed Efendi ile mukaddemâ zevciyet beynimizde kāime iken mezbûrun firâşından hâsıla ve benden mütevellide ve bi-hakkı’l-hıdâne hâlâ hacr ve terbiyemde olan sulbiye kızı tahmînen yedi yaşında Fâtımatü’z-zehra nâm sagīrenin aslâ mâlı olmayıp nafaka ve kisveye eşedd-i ihtiyâc ile muhtâce olmağla sagīre-i mezbûrenin nafaka ve kisve-bahâsı için pederi mezbûr Mehmed Efendi üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne murâdımdır dedikde gıbbe’t-tasdîki’ş-şer‘î hâkim-i hâsim-i vâlâ-cenâbi’l-muvakki‘ ismuhu fî sadri’l-kitâb tûbâ lehû ve hüsnü me’âb efendi hazretleri dahi sagīre-i mezbûrenin nafaka ve kisve-bahâsı için pederi mezbûr Mehmed Efendi üzerine işbu târih-i kitâbdan i‘tibâren bi’t-terâzi beher şehr altmış guruş farz ve takdîr buyurup meblağ-ı mefrûz-ı mezkûru sagīre-i mezbûrenin nafaka ve kisve ve sâir levâzım-ı zarûriyesine harc u sarfa ve lede’l-iktizâ istidâneye ve inde’z-zafer pederi mezbûr Mehmed Efendi üzerine rucû‘a vâlidesi ve hâdinesi mezbûre Şerife Emine Hanım’a izin vermeğin mâ-vaka‘a bi’t-taleb ketb olundu. Fî 25 Zilhicce sene 1278 Şuhûdü’l-hâl: Şâhidûn es-sâbıkūn