Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 523 Hüküm no: 629 Orijinal metin no: [109a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saliha bt. Ali’nin kocasını öldüren Mustafa b. Receb ile diyette sulh olması Mahrûse-i Galata’ya tâbi‘ kasaba-i Kasımpaşa’da Piyâle Paşa mahallesinde sâkin iken bundan akdem maktûlen vefât eden Mustafa b. Mehmed’in verâseti zevce-i metrûkesi Sâliha bt. Ali ile batnında mütebeyyin olan hamle münhasıra olduğu lede’ş-şer‘i’l-enver sâbit ve mütehakkik oldukdan sonra mezbûre Sâliha meclis-i şer‘-i şerîf-i enverde yine kasaba-i mezbûrede Küçük Piyâle Paşa mahallesinde sâkin zikr-i âtî husûs için mahbûs olan Mustafa b. Receb’in vâlidesi ve tarafından vekîl-i şer‘îsi olan Ümmühâni bt. Ramazan mahzarında ikrâr-ı tâm ve takrîr-i kelâm edip mezbûr Mustafa zevcim mezkûru mukaddemâ cerh ve katl etmekle diyet-i kâmilesinden hisse-i irsiyyemi taleb ve da‘vâ eylediğimde muslihûn tavassut edip da‘vâ-yı mezkûremden mezkûr Ümmühâni vekâleti hasebiyle beni iki yüz esedî guruş üzerine sulh eylediğinden, ben dahi sulh-i mezbûru kabûl ve bedel-i sulh olan [109b] meblağ-ı mezbûrun iki yüz esedî guruşun elli guruşunu hâlâ kabz edip mâ‘adâ yüz elli guruşu def‘ [ü] edâya iktidârı olmayıp taksîte tâlib oldukda ben dahi meblağ-ı bâkī-i mezbûr yüz elli esedî guruşu her otuz gün tamâmında dörder guruş verip bin seksen gün tamâmında yüz kırk sekiz guruşunu ve on beş gün tamâmında dahi bâkī iki guruşu verip tamâmen edâ etmek üzre taksît edip kendi kıbelimden mezbûr ile da‘vâ ve nizâ‘ım kalmamışdır suâl olunup takrîr tahrîr olunması matlûbumdur dedikde gıbbe’s-suâl mezbûre Ümmühâni cevâbında fi’l-hakīka hâl bâlâda bast olunan minvâl üzre olup bâkī yüz elli guruş ber vech-i mukâssat müvekkil-i mezbûrun deyni olup ve deyn-i mukâssat-ı mezkûru kendi kefâlet-i sahîha-i şer‘iyye ile kefîl oldum dedikde mukırra-i mezbûrenin zevci Ömer b. Halil dahi meblağ-ı mukâssat-ı mezbûra kefîl olmağın mâ vaka‘a bi’t-taleb ketb olundu. Fi’l-yevmi’s-sânî aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Hüseyin Efendi b. Mehmed el-İmâm, Veli b. Hasan, Yusuf b. Abdullah, Ahmed Beşe b. Abdullah.