İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 101 Hüküm no: 46 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtımatü’z-zehra Hanım bt. Hasan’ın boşandığı eşinden çocuğu için aylık 80 kuruş nafaka bağlattırması Nafaka-i sagīr 80 guruş Mahmiye-i İstanbul’da Avrat Pazarı kurbünde Canbaziye mahallesinde sâkine zâtı ta‘rîf-i şer‘î ile mu‘arrefe olan işbu bâ‘isetü’l-kitâb Fâtımatü’z-zehrâ Hanım bt. Hasan meclis-i şer‘-i şerîf-i lâzımü’t-teşrîfde mahrûse-i Galata’ya muzâfe kasaba-i Kasımpaşa’da Nalinci mahallesinde sâkin Tersane-i âmire Fabrikası’nda çarhçı mülâzım-ı sânîsi İsmail Efendi b. el-hâzır Binbaşı Hüseyin Bey mahzarında ikrâr-ı tâm ve ta‘bîr ani’l-merâm edip mûmâ-ileyh İsmail Efendi ile mukaddemâ zevciyet beynimizde kāime iken mûmâ-ileyhin firâşından hâsıl ve benden mütevellid ve bi-hakkı’l-hıdâne hacr ve terbiyemde olan sulbî oğlu tahmînen bir buçuk aylık Mehmed Şefik nâm sagīrin aslâ mâlı olmayıp nafaka ve kisveye eşedd-i ihtiyâc ile muhtâc olmağla sagīr-i mezbûrun nafaka ve kisve-bahâsı için pederi mûmâ-ileyh İsmail Efendi üzerine kıbel-i şer‘den kadr-ı ma‘rûf nafaka farz ve takdîr olunmak murâdımdır dedikde gıbbe’t-tasdîk hâkim-i hâsim-i vâlâ-cenâbi’l-muvakki‘ ismuhu fî sadri’l-kitâb tûbâ lehû ve hüsnü me’âb efendi hazretleri dahi sagīr-i mezbûrun nafaka ve kisve-bahâsı için pederi mûmâ-ileyh İsmail Efendi üzerine işbu târih-i kitâbdan i‘tibâren bi’t-terâzi beher şehr seksener guruş farz ve takdîr buyurup meblağ-ı mefrûz-ı mezkûru sagīr-i mezbûrun nafaka ve kisve ve sâir levâzım-ı zarûriyesine harc u sarfa ve lede’l-iktizâ istidâneye ve inde’z-zafer pederi mûmâ-ileyh İsmail Efendi üzerine rucû‘a vâlidesi ve hâdinesi mûmâ-ileyhâ Fâtımatü’z-zehraHanım’a izin vermeğin mâ-vaka‘a bi’t-taleb ketb olundu. Fî 7 Şevval sene 1278 Şuhûdü’l-hâl: Eş-Şâhidûn es-sâbıkūn